Braziliyalik olimlar tabiiy qarish va demensiya bilan bog‘liq kognitiv buzilishlarni bartaraf etishga qodir molekulani aniqlashdi. Aging Cell jurnalida e’lon qilingan tadqiqot natijalariga ko‘ra, miyaning yordamchi hujayralari - astrotsitlar tomonidan ishlab chiqariladigan xevin nomli modda sichqonlarda neyronlar o‘rtasidagi aloqalar sifatini yaxshilaydi va xotirani tiklaydi.
Tajribalar shuni ko‘rsatdiki, xevin miqdorining oshishi ham Alsgeymer kasalligi modellari, ham sog‘lom keksa hayvonlarda kognitiv pasayishning oldini oladi. Qiziq tomoni shundaki, bu modda Alsgeymerning an’anaviy belgisi hisoblangan beta-amiloid pilakchalariga ta’sir ko‘rsatmagan.
Mualliflarning fikricha, bu kasallik faqat pilakchalarning to‘planishi emas, balki neyroplastiklikning pasayishi kabi ko‘plab omillar tufayli yuzaga kelishi mumkinligini tasdiqlaydi.
Tadqiqotchilarning ta’kidlashicha, kashfiyotning asosiy ahamiyati astrotsitlarning rolini qayta ko‘rib chiqishdan iborat. Ilgari asosiy e’tibor neyronlarga qaratilgan bo‘lsa, endi aniq bo‘ldiki, miyaning qo‘llab-quvvatlovchi hujayralari demensiya va yoshga bog‘liq xotira buzilishlarini davolashning yangi usullari uchun asosiy nishonga aylanishi mumkin.
Bundan avval San-Antoniodagi Texas universiteti Tibbiyot fanlari markazi olimlari to‘qqiz soat va undan ortiq davom etadigan tungi uyqu kognitiv funksiyalarning yomonlashishiga olib kelishi mumkinligi, bu ta’sir depressiya alomatlari bo‘lgan odamlarda yaqqol namoyon bo‘lishi haqida xabar berilgandi.
Izoh (0)