Бразилиялик олимлар табиий қариш ва деменция билан боғлиқ когнитив бузилишларни бартараф этишга қодир молекулани аниқлашди. Аging Cell журналида эълон қилинган тадқиқот натижаларига кўра, миянинг ёрдамчи ҳужайралари - астроцитлар томонидан ишлаб чиқариладиган хевин номли модда сичқонларда нейронлар ўртасидаги алоқалар сифатини яхшилайди ва хотирани тиклайди.
Тажрибалар шуни кўрсатдики, хевин миқдорининг ошиши ҳам Альцгеймер касаллиги моделлари, ҳам соғлом кекса ҳайвонларда когнитив пасайишнинг олдини олади. Қизиқ томони шундаки, бу модда Альцгеймер нинг анъанавий белгиси ҳисобланган бета-амилоид пилакчаларига таъсир кўрсатмаган.
Муаллифларнинг фикрича, бу касаллик фақат пилакчаларнинг тўпланиши эмас, балки нейропластикликнинг пасайиши каби кўплаб омиллар туфайли юзага келиши мумкинлигини тасдиқлайди.
Тадқиқотчиларнинг таъкидлашича, кашфиётнинг асосий аҳамияти астроцитларнинг ролини қайта кўриб чиқишдан иборат. Илгари асосий эътибор нейронларга қаратилган бўлса, энди аниқ бўлдики, миянинг қўллаб-қувватловчи ҳужайралари деменция ва ёшга боғлиқ хотира бузилишларини даволашнинг янги усуллари учун асосий нишонга айланиши мумкин.
Бундан аввал Сан-Антониодаги Техас университети Тиббиёт фанлари маркази олимлари тўққиз соат ва ундан ортиқ давом этадиган тунги уйқу когнитив функцияларнинг ёмонлашишига олиб келиши мумкинлиги, бу таъсир депрессия аломатлари бўлган одамларда яққол намоён бўлиши ҳақида хабар берилганди.
Изоҳ (0)