Amerika Dermatologiya akademiyasi olimlari yurak kasalliklari haqida avvaldan darak beruvchi uchta noodatiy belgilar haqida ma’lumot berdi.
BristolLive nashriga ko‘ra, butun dunyoda yurak-qon tomir kasalliklari bevaqt o‘limning asosiy sabablaridan biri bo‘lib qolmoqda. Bunday kasalliklar har yili 18 milliondan ortiq odamning hayotiga zomin bo‘ladi. Yurak-qon tomir kasalliklari orasida insult, ishemik kasallik va yurak yetishmovchiligi kabilar tobora yoshroq insonlarda ham uchramoqda.
Muammo shundaki, ko‘pchilik organizmidagi muhim alomatlarga e’tibor bermaydi yoki juda kech anglab yetadi. Yurak kasalliklari faqat ko‘krak og‘rig‘i yoki nafas qisilishi bilan kechmaydi. Ba’zan bu belgilar kutilmagan joylarda, jumladan, oyoq panjalarida ham paydo bo‘lishi mumkin.
Barmoqlardagi qattiq tugunlar
Oyoq barmoqlarida uchraydigan bunday kasallik Osler tugunlari deb ataladi. Ular qo‘llarda ham uchrashi mumkin.
“Bu tugunlar bir necha soatdan bir necha kungacha saqlanishi mumkin. Ular o‘z-o‘zidan yo‘qoladi, ammo bemorga infeksiyaga qarshi davolanish zarur bo‘ladi, chunki bu holat bakteriyalar sababli yuzaga keladi, antibiotiklar ko‘pincha foyda beradi. Ba’zida operatsiya ham talab etiladi”, deydi olimlar.
Osler tugunlari yurak ichki qavatining yallig‘lanishi — infeksion endokardit bilan bog‘liq muhim klinik belgilardan biridir.
Oyoqlarning shishishi
Amerika Dermatologiya akademiyasiga ko‘ra, bu yurakning noto‘g‘ri ishlayotganidan dalolat bo‘lishi mumkin. Yurak kasalliklari sababli yuzaga kelgan shish oyoq panjalarida, to‘piqlarda va oyoqlarning boshqa qismlarida kuzatiladi.
Ko‘kargan barmoqlar
Bu qon tomirlarining yaxshi aylanmayotganidan darak berishi mumkin, ammo odam shunchaki sovuq qotganida ham barmoqlar ko‘kargandek bo‘lishi mumkin va bu odatiy hol.
“Agar tana terisining biror qismi iliq bo‘lgan holatda ham barmoqlar ko‘k (yoki binafsha) rangga kirsa, bu qon tarkibida kislorod yetarli emasligini bildiradi”, deyiladi akademiya xulosasida.
Bu holat oxir-oqibat teri ostidagi to‘qimalarning nobud bo‘lishiga olib keladi. Tibbiyotda bu holat “sianoz” deb ataladi.
Izoh (0)