Ukraina prezidenti Vladimir Zelenskiy Rossiya xitoyliklarni urushga turli ijtimoiy tarmoqlar, jumladan, TikTok orqali jalb qilayotganini aytdi. Siyosatchi harbiy harakatlarga jalb qilingan Xitoy fuqarolari sonini ma’lum qildi.
Rossiya qo‘shinlari tarkibida qo‘lida qurol bilan jang qilayotgan 155 nafar Xitoy fuqarosi haqida ma’lumot mavjud. Hozirda qo‘shimcha ma’lumotlarni to‘plash ustida ish olib borilmoqda.
“Xitoyliklar masalasi” jiddiy. Hozirda bizda 155 nafar kishi haqida ma’lumot bor — ularning familiyalari, pasport ma’lumotlari mavjud. Bu 155 kishi Xitoy fuqarolari bo‘lib, Ukraina hududida ukrainaliklarga qarshi jang qilmoqda.
Biz bu borada ma’lumot to‘playapmiz va ular soni bundan ham ko‘proq, deb hisoblaymiz. Shu 155 kishi haqida barcha tafsilotlar bor: qayerdanligi, xitoy hujjatlari, yoshi va hokazo. Ularning xizmat qilayotgan joylari ham aniq: 70, 71, 255-motorlashgan miltiq polklari va shunga o‘xshash bo‘linmalar, dedi Zelenskiy.
Prezident ular urushga qanday yollanayotgani bo‘yicha sxemadan xabardor ekanini aytdi.
Birinchi sxemalardan biri — ijtimoiy tarmoqlar orqali, ruslar xususan TikTok va boshqa Xitoy ijtimoiy tarmoqlari orqali reklama roliklarini tarqatmoqda. Yashirin yollash emas — bu muhim. Ehtimol, yana yashirin yo‘llar bordir, deya ta’kidladi Ukraina prezidenti.
Siyosatchi mavjud ma’lumotlarga tayanib, keyinchalik yollanganlar Moskvaga kelishi, 3—4 kun davomida tibbiy ko‘rikdan o‘tishi va 1—2 oy davomida o‘quv markazlarida bo‘lishini aytdi.
Ular Ukraina hududida jang qilmoqda. Migratsiya kartalarini, shuningdek, “Mir” to‘lov tizimining kartasini olishadi, unga esa, mos ravishda, pul mablag‘lari o‘tkaziladi, deya tushuntirdi Zelenskiy.
Ukrainada allaqachon Xitoyning ikki fuqarosi asirga olingan. Ulardan biri 4-aprelda Donetsk viloyatining Belogorovka shahrida, ikkinchisi esa 5-aprelda Donetsk viloyatining Tarasovka shahri yaqinida ushlangan.
Bu ikkisi Donetsk yo‘nalishida qo‘lga olingan. Biz Ukraina sharqida boshqalari ham bor deb hisoblaymiz, lekin buni ko‘rib chiqish kerak. Bu yerda ikki xil qishloq, ikki xil brigada bor, dedi Zelenskiy.
Qo‘lga olingan xitoylik asirdan birining urushga borishdagi asosiy motivatsiyasi — harbiy bo‘lish va Rossiya fuqaroligini olish istagi bo‘lgan. Oilasi uning Rossiyaga borish niyatidan xabardor bo‘lgan. Ukraina prezidenti asirlar Kiyevdagi Xavfsizlik xizmatiga yetkazilganini aytdi.
O‘ylaymanki, biz jurnalistlarga ular bilan muloqot qilish imkoniyatini beramiz, bu o‘rinli bo‘ladi. Ular Shimoliy Koreyadan kelgan asirlarga qaraganda ancha gapdonroq, deya xulosa qildi davlat rahbari.
AQSH va Xitoy qanday munosabatda?
Ukraina prezidenti Xitoy va AQSHning asirga olingan xitoyliklar bilan bog‘liq vaziyatga ehtimoliy munosabati haqida gapirdi.
AQSH juda hayratda va bunga yo‘l qo‘yib bo‘lmaydi, deb hisoblaydi. Ular bizga shunday signallar berishdi. Men tashqi ishlar vaziridan bu bilan shug‘ullanishni so‘radim. U Xitoy tomoni bilan aloqada. Hozircha qo‘shimcha ma’lumot yo‘q, dedi u.
Yanvar oyida Ukraina armiyasi Kursk viloyatida shimoliy koreyalik ikki askarni asirga olgandi. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qilgan. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidlagan.
Izoh (0)