Shimoliy Koreya 2025-yilning yanvar va fevral oylarida Rossiyaga qo‘shimcha uch mingga yaqin harbiy xizmatchi yubordi. Bu haqda Janubiy Koreya shtab boshliqlari birlashgan qo‘mitasiga tayanib Associated Press xabar berdi.
Ma’lum qilinishicha, Pxenyan Moskvaga tobora ko‘proq raketalar, artilleriya uskunalari va o‘q-dorilar yubormoqda. Shimoliy Koreya frontdagi vaziyatga qarab qurol-yarog‘ yetkazib berishni oshirishi mumkin. Shu paytgacha yetkazib berilgan o‘q-dorilar va harbiy texnika orasida qisqa masofali ballistik raketalar, 170 millimetrli o‘ziyurar gaubitsalar va 220 ga yaqin 240 millimetrli baravar o‘t ochish reaktiv tizimlari bor.
Rossiya va Shimoliy Koreya urush boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzoladi.
Ukraina armiyasi Kursk viloyatida shimoliy koreyalik ikki askarni asirga oldi. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidladi.
Ukraina armiyasi bunday yo‘qotishlarni bir qator sabablar bilan izohlamoqda. Jumladan, Shimoliy Koreya askarlari “Ikkinchi jahon urushi” davridagi kabi piyoda hujum qilgan va Ukraina dronlari hamda artilleriyasi uchun oson nishon bo‘lgan. Ular odatda nishonga olinsalar ham, hujumni davom ettirgan.
Bundan tashqari, asirga tushmaslik uchun Shimoliy Koreya askarlari o‘zlarini granatalar bilan portlatgan. Shuningdek, KXDR askarlari til bilan bog‘liq muammo tufayli Rossiya qo‘shinlari bilan kontaktga yaxshi kirishmagan. Hatto tasodifan Rossiya pozitsiyalariga hujum qilgan. Shimoliy Koreya Moskvani qo‘llab-quvvatlash uchun 100 minggacha askar berishga tayyorligini ma’lum qilgani aytilmoqda.
Izoh (0)