Rossiya qo‘shinlari 6-aprel kuni Kiyevga raketalar bilan hujum qildi. Oqibatda kamida uch kishi jarohatlandi. Bu haqda shahar meri Vitaliy Klichko xabar berdi.
Kiyevning Darnitskiy tumanida qutqaruvchilar bir kishining jasadini aniqladi. Shaharning Darnitskiy, Solomenskiy va Obolonskiy tumanlarida yong‘inlar sodir bo‘ldi. Noturar joy binosi qulab tushib, bir nechta avtomashinalarga zarar yetkazdi. Biznes-markaz binosi qisman shikastlandi.
Qutqaruvchilarning ma’lum qilishicha, hujum oqibatida jami uch kishi jabrlangan, ulardan ikki nafari kasalxonaga yotqizilgan. Bundan tashqari, Rossiya armiyasi Xarkov viloyatidagi Kupyansk shahri aholisi yashaydigan hududlariga aviabombalar tashlagan. Oqibatda ikki kishi jarohat olgan. Bombalardan biri to‘qqiz qavatli turar joy binosiga tushgan. Oltita balkon va umumiy maydoni 100 kvadrat metr bo‘lgan to‘rtta kvartira yonib ketgan.
Shuningdek, xususiy va ko‘p qavatli turar joy binolari shikastlangan. Ukraina Qurolli Kuchlari hujum paytida to‘qqizta X-101/X-55SM raketasidan oltitasi, sakkizta “Kalibr”dan oltitasi, oltita “Iskander”dan bittasi va 109 ta drondan 40 tasi urib tushirilganini ma’lum qildi.
Zelenskiy munosabati
Ukraina prezidenti Vladimir Zelenskiyning so‘zlariga ko‘ra, o‘tgan hafta davomida Rossiya qo‘shinlari Ukrainaga 1460 dan ortiq boshqariladigan aviabombalar, 670 ga yaqin zarba beruvchi dronlar va 30 dan ortiq turli rusumdagi raketalar uchirgan.
Rossiyaga bosim haligacha yetarli emas va Rossiyaning Ukrainaga kunlik zarbalari buni isbotlamoqda. Bu kecha — Kiyevga qarshi ballistika, viloyat bo‘ylab zarba beruvchi dronlar uchirildi. Shuningdek, Nikolayev, Sumi, Xarkov, Xmelnitskiy va Cherkas viloyatlariga zarba berildi. Shuning uchun bosim pasayishi mumkin emas. Xavfsizlikni ta’minlash va tinchlikni yaqinlashtirish uchun barcha kuchlarni yo‘naltirish lozim, dedi Zelenskiy.
Izoh (0)