Ukrainalik muhandislar dengiz, quruqlik va havodagi nishonlarni yo‘q qilishga qodir “Katran” dronini namoyish qildi. Bu haqda raqamli transformatsiya vaziri Mixail Fedorov xabar berdi.
Mazkur dron boshqalariga qaraganda ancha keng imkoniyatlarga ega. Uning ishtirokidagi missiyalar haqidagi ma’lumotlar maxfiylashtirilgan. Dron torpeda, minigan, pulemyot, ko‘chma zenit-raketa kompleksi va boshqa qurollar bilan jihozlangan. U 1000 kilometrdan ortiq masofani “xotirjam bosib o‘ta oladi”, zarbalar beradi va razvedka missiyalarini bajaradi.
“Katran” uchun alohida radioelektron kurash tizimi kerak emas, chunki u tahdidlarni avtomatik aniqlash va chalg‘ituvchi tuzoqlarni ishga tushirish tizimi bilan jihozlangan. Bu — urush olib borishda yangi standartni belgilovchi supertexnologiya, dedi Fedorov.
2024-yil Ukraina prezidenti Vladimir Zelenskiy armiya urushda 700 kilometrgacha uchadigan yangi “Peklo” dronini qo‘llaganini aytgandi. Raketa soatiga 700 kilometr tezlikka erishadi, maksimal parvoz masofasi 700 km bilan cheklangan. “Peklo”ning 70 foizi davlat va xususiy kompaniyalar tomonidan ishlab chiqariladigan mahalliy komponentlardan iborat.
Izoh (0)