Parijda bo‘lib o‘tgan “xohlovchilar koalitsiyasi” sammiti ishtirokchilari Ukraina mustahkam va adolatli tinchlikka erishgunga qadar uni harbiy, moliyaviy va energetik jihatdan qo‘llab-quvvatlashni kuchaytirish bo‘yicha kelishuvga erishdi. Bu haqda DW nashri Yevropa ittifoqi diplomatiga asoslanib xabar bermoqda.
31 davlat, shuningdek, Yevropa ittifoqi va NATO vakillari ishtirok etgan uchrashuvda Kiyevga ko‘rsatilayotgan harbiy, moliyaviy va energetik yordam kuchaytirilishi, shuningdek, Rossiyaga qarshi mudofaa urushi olib borayotgan mamlakatni tiklashda ko‘maklashish rejalari e’lon qilindi.
Sammit ishtirokchilari Ukrainaga qo‘shimcha 17 milliard yevro miqdorida harbiy yordam ajratish, Kiyevga 2 million dona artilleriya o‘q-dorisini yetkazib berish va Yevropa ittifoqiga a’zo davlatlar tomonidan ko‘rsatilayotgan yordam Ukraina ehtiyojlariga mos kelishi uchun o‘zaro muvofiqlashtirishni yaxshilash majburiyatini oldi. Bundan tashqari, Yevropa rahbarlari Ukraina mudofaa sanoati bilan hamkorlikni kuchaytirish va Ukraina harbiylarini tayyorlash bo‘yicha YI missiyasini rivojlantirishni davom ettirish to‘g‘risida kelishib olgan.
Uchrashuvda ishtirok etgan Ukraina prezidenti Vladimir Zelenskiy ittifoqchilarni bir qator savollarga aniq javob berishga chaqirgan.
“Uzoq muddatli xavfsizligimizni ta’minlashda ko‘rsatgan samimiy yordami uchun Fransiya, Buyuk Britaniya va barcha ishtirokchilarga minnatdorlik bildiraman. Ukrainada quruqlikda, havoda va dengizda qaysi davlatlar ishtirok etadi? Bu kuchlar aynan qayerga joylashtiriladi? Ularning soni va tuzilishi qanday bo‘ladi? Koalitsiyamiz Ukrainada kuchlarni qachon joylashtiradi — sulh boshlanganida yoki urush to‘liq tugatilgach, kelishuvga erishilganda? ”, dedi Vladimir Zelenskiy.
Izoh (0)