Ukraina prezidenti Vladimir Zelenskiy 3-aprel kuni Chernigov va Sumi viloyatlarida bo‘ldi. Ushbu hududlar Rossiyaning Kursk viloyati bilan chegaradosh bo‘lib, 2024-yilda Ukraina qo‘shinlari bu hududga bostirib kirgan edi.
Bugungi kunda Chernigov va Sumi viloyatlari strategik yo‘nalish sanaladi. Ular Rossiya bilan chegarada joylashgan. Men jangchilarimizga — Kurskdagi vazifalarni bajarayotgan, davlatimizni himoya qilayotgan, shuningdek, ruslarning bu yo‘nalish orqali Ukrainaga bostirib kirishiga doimiy urinayotgan harakatlariga qarshi Sumini himoya qilayotgan barcha harbiylarga minnatdorlik bildirmoqchiman, dedi Zelenskiy.
Prezident, shuningdek, harbiylar bilan uchrashib, Kursk viloyatidagi harbiy operatsiyalar borasidagi hisobotlarni eshitdi.
Mudofaa chizig‘ida olib borilayotgan jangovar harakatlar, xususan, Shimoliy Koreya bo‘linmalarining taktikasi haqidagi hisobotlarni tingladim. Jangchilarimizga shaxsan minnatdorlik bildirib, ularni davlat mukofotlari bilan taqdirlash sharafiga muyassar bo‘ldim. Kurskdagi operatsiyaning muvaffaqiyati ko‘plab insonlarning hayotini saqlab qoldi va Sumi hamda Xarkov viloyatlarini himoya qilishga xizmat qildi. Butun Ukraina sizlarning jasoratingiz va matonatingizni qadrlaydi, dedi Zelenskiy harbiylarga murojaat qilib.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi. Bundan tashqari Ukraina tinchlikka eshitilganidan keyin Rossiya hujumni qayta boshlamasligi uchun xavfsizlik kafolatlari talab qilmoqda. Bu tinchlikparvar kontingentni Ukrainaga joylashtirishni nazarda tutadi. Rossiya esa xorijiy ishtirokni qabul qilmasligini qayd etgan.
Kurskka hujum
2024-yil 6-avgustda Ukraina armiyasi Kursk viloyatida harbiy operatsiyani boshladi. 12-avgustga kelib, 28 ta aholi punkti Ukraina kuchlari nazoratiga o‘tgani haqida o‘sha paytda viloyat gubernatori vazifasini bajaruvchi Aleksey Smirnov xabar berdi. Yanvar oyida Rossiya Mudofaa vazirligi Ukraina tomoni 1268 kv/km hududini egallab olganini ma’lum qildi (Kursk viloyatining umumiy maydoni — 29,9 ming kv/km). Yanvar oyi o‘rtalariga kelib, Rossiya idorasi ma’lumotlariga ko‘ra, 801 kv/km (63,2 foiz) qaytarib olishga erishilgan.
Zelenskiyning so‘zlariga ko‘ra, Kurskdagi operatsiyasining asosiy vazifasi Rossiyaning harbiy salohiyatini imkon qadar yo‘q qilish, qarshi hujumlarni kuchaytirish hamda Rossiya hududida bufer zona yaratishdan iboratdir.
Izoh (0)