Ukraina armiyasi Kurskda ikki nafar shimoliy koreyalik harbiyni qo‘lga oldi (foto)

Ukraina prezidenti Vladimir Zelenskiy ukrainalik harbiylar Kursk viloyatida shimoliy koreyalik ikki askarni asirga olganini ma’lum qildi.

Ikkala asir ham Kiyevga jo‘natilgan, hozirda ular bilan Ukraina Xavfsizlik xizmati (UXX) tergovchilari ish olib bormoqda.

“Jangchilarimiz Kursk viloyatida Shimoliy Koreyadan kelgan harbiylarni asirga oldi. Ikki askar ham yaralangan, ammo omon qolgan”, deb yozdi Zelenskiy o‘zining Telegram kanalida.

Zelenskiyga ko‘ra, ularni qo‘lga olish operatsiyasi murakkab kechgan. U boshqa harbiy asirlar singari KXDRdan kelgan asirlarga ham zarur tibbiy yordam ko‘rsatilayotganini ta’kidladi. Shuningdek, u “dunyo haqiqatni bilishi uchun” UXXga jurnalistlarning asirlar oldiga kirishini ta’minlashni topshirdi.

Xavfsizlik xizmati ma’lumotlariga ko‘ra, asirga olingan shimoliy koreyaliklar na ukrain, na rus va na ingliz tillarida gaplashadi. Ulardan birida boshqa shaxsning nomiga berilgan Rossiya nusxasidagi harbiy guvohnoma bo‘lgan, ikkinchisi hujjatsiz.

Asirlardan biri Rossiyaga jangovar harakatlarda qatnashish uchun emas, balki mashqlarda ishtirok etish uchun kelganini ta’kidlagan. Uning sherigi ham bu gapni tasdiqlagan.

UXXning aniqlik kiritishicha, 2005-yilda tug‘ilgan harbiy asirlardan biri 2021-yildan beri KXDR armiyasida o‘qchi sifatida xizmat qilgan. 1999-yilda tug‘ilgan ikkinchi askar esa 2016-yildan beri mamlakat armiyasida mergan-razvedkachi bo‘lgan.

2024-yil dekabr oyida Ukraina QK ilk bor Rossiya tomonida jangovar harakatlarda qatnashgan shimoliy koreyalik askarni asirga olganini ma’lum qilgandi. Ko‘p o‘tmay Janubiy Koreya razvedkasi mazkur asir vafot etgani haqida xabar bergan.

Ukraina hukumati 2024-yilning oktyabr oyida jangovar harakatlar hududida shimoliy koreyalik harbiylar borligini qayd etgandi. Bu ma’lumotni Janubiy Koreya razvedkasi va AQSH Mudofaa vazirligi ham tasdiqlagan. Ukraina va uning g‘arblik ittifoqchilari ma’lumotlariga ko‘ra, KXDR Rossiyaga kamida 10 ming askar yuborgan.

New York Times’ga ko‘ra, shimoliy koreyalik harbiylar va Ukraina kuchlari o‘rtasidagi dastlabki to‘qnashuvlar 2024-yil noyabr oyida Kursk viloyatida yuz bergan.

Janubiy Koreya Qo‘shma shtablar qo‘mitasi 23-dekabr kuni KXDRning mojarodagi yo‘qotishlari 1100 kishini tashkil etganini ma’lum qilgan. Vladimir Zelenskiy 9-yanvar kuni Ramshtaynda bo‘lib o‘tgan Ukraina bo‘yicha yig‘ilishda so‘zga chiqib, Shimoliy Koreya Kursk viloyati hududida 4 ming askarini yo‘qotganini aytgan.