Украина президенти Владимир Зеленский Россия хитойликларни урушга турли ижтимоий тармоқлар, жумладан, TikTok орқали жалб қилаётганини айтди. Сиёсатчи ҳарбий ҳаракатларга жалб қилинган Хитой фуқаролари сонини маълум қилди.
Россия қўшинлари таркибида қўлида қурол билан жанг қилаётган 155 нафар Хитой фуқароси ҳақида маълумот мавжуд. Ҳозирда қўшимча маълумотларни тўплаш устида иш олиб борилмоқда.
“Хитойликлар масаласи” жиддий. Ҳозирда бизда 155 нафар киши ҳақида маълумот бор — уларнинг фамилиялари, паспорт маълумотлари мавжуд. Бу 155 киши Хитой фуқаролари бўлиб, Украина ҳудудида украиналикларга қарши жанг қилмоқда.
Биз бу борада маълумот тўплаяпмиз ва улар сони бундан ҳам кўпроқ, деб ҳисоблаймиз. Шу 155 киши ҳақида барча тафсилотлар бор: қаерданлиги, хитой ҳужжатлари, ёши ва ҳоказо. Уларнинг хизмат қилаётган жойлари ҳам аниқ: 70, 71, 255-моторлашган милтиқ полклари ва шунга ўхшаш бўлинмалар, деди Зеленский.
Президент улар урушга қандай ёлланаётгани бўйича схемадан хабардор эканини айтди.
Биринчи схемалардан бири — ижтимоий тармоқлар орқали, руслар хусусан TikTok ва бошқа Хитой ижтимоий тармоқлари орқали реклама роликларини тарқатмоқда. Яширин ёллаш эмас — бу муҳим. Эҳтимол, яна яширин йўллар бордир, дея таъкидлади Украина президенти.
Сиёсатчи мавжуд маълумотларга таяниб, кейинчалик ёлланганлар Москвага келиши, 3—4 кун давомида тиббий кўрикдан ўтиши ва 1—2 ой давомида ўқув марказларида бўлишини айтди.
Улар Украина ҳудудида жанг қилмоқда. Миграция карталарини, шунингдек, “Мир” тўлов тизимининг картасини олишади, унга эса, мос равишда, пул маблағлари ўтказилади, дея тушунтирди Зеленский.
Украинада аллақачон Хитойнинг икки фуқароси асирга олинган. Улардан бири 4 апрелда Донецк вилоятининг Белогоровка шаҳрида, иккинчиси эса 5 апрелда Донецк вилоятининг Тарасовка шаҳри яқинида ушланган.
Бу иккиси Донецк йўналишида қўлга олинган. Биз Украина шарқида бошқалари ҳам бор деб ҳисоблаймиз, лекин буни кўриб чиқиш керак. Бу ерда икки хил қишлоқ, икки хил бригада бор, деди Зеленский.
Қўлга олинган хитойлик асирдан бирининг урушга боришдаги асосий мотивацияси — ҳарбий бўлиш ва Россия фуқаролигини олиш истаги бўлган. Оиласи унинг Россияга бориш ниятидан хабардор бўлган. Украина президенти асирлар Киевдаги Хавфсизлик хизматига етказилганини айтди.
Ўйлайманки, биз журналистларга улар билан мулоқот қилиш имкониятини берамиз, бу ўринли бўлади. Улар Шимолий Кореядан келган асирларга қараганда анча гапдонроқ, дея хулоса қилди давлат раҳбари.
АҚШ ва Хитой қандай муносабатда?
Украина президенти Хитой ва АҚШнинг асирга олинган хитойликлар билан боғлиқ вазиятга эҳтимолий муносабати ҳақида гапирди.
АҚШ жуда ҳайратда ва бунга йўл қўйиб бўлмайди, деб ҳисоблайди. Улар бизга шундай сигналлар беришди. Мен ташқи ишлар вазиридан бу билан шуғулланишни сўрадим. У Хитой томони билан алоқада. Ҳозирча қўшимча маълумот йўқ, деди у.
Январь ойида Украина армияси Курск вилоятида шимолий кореялик икки аскарни асирга олганди. Президент Владимир Зеленский 12 январь куни улар сўроққа тутилгани акс этган видеони эълон қилган. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)