Isroil va HAMAS 15 oylik urushdan so‘ng AQSH va Qatar vositachiligida o‘t ochishni to‘xtatish to‘g‘risidagi bitimni imzoladi. Bu haqda manabalarga tayanib, Axios va Jerusalem Post xabar berdi.
Bitim HAMAS tomonidan garovga olinganlarni bosqichma-bosqich ozod qilishni ham nazarda tutadi. Isroil vazirlar mahkamasi kelishuvni ma’qullash bo‘yicha ovoz berishni 18-yanvarga qoldirgan. Bu mahbuslarni ozod qilish uchun zarur.
“Shu munosabat bilan bitimning kuchga kirishi 19-yanvardan taxminan 20-yanvar kuni tushga qoldiriladi”, dedi Isroil bosh vaziri Binyamin Netanyaxuning yordamchisi.
AQSH Davlat kotibi Entoni Blinken esa bitim Isroil hukumati yig‘ilishi qoldirilganiga qaramay, rejalashtirilgan vaqtda kuchga kirishini aytgandi. Hujjat AQSH, Qatar va Misr vositachiligida imzolangan. Urushayotgan tomonlar o‘rtasida Doha va Qohirada bilvosita muzokaralar olib borilgan.
Bitimning birinchi bosqichida HAMAS Isroil tomoniga 33 nafar garovga olinganlarni topshiradi, ularning aksariyati tirik deb taxmin qilinmoqda. Bular asosan ayollar, bolalar, keksalar, bemorlar va yaradorlardir. Bunga javoban Isroil yuzlab falastinlik mahbuslarni qamoqdan ozod qiladi.
Kelishuv shartlariga ko‘ra, Isroil armiyasi G‘azo sektori hududlarining aksariyat qismidan chiqib ketadi, faqatgina G‘azo sektori va Misr o‘rtasidagi Filadelfiya yo‘lagida, shuningdek, Falastin eksklavi va Isroil chegarasidagi maxsus bufer hududida harbiy mavjudligini saqlab qoladi. G‘azoning tinch aholisi o‘z uylariga, jumladan, janglar tufayli eng ko‘p zarar ko‘rgan shimoliy hududlarga ham qaytish imkoniyatiga ega bo‘ladi.
O‘n oltinchi kuni bitimning ikkinchi bosqichi bo‘yicha muzokaralar boshlanadi. Bu bosqichda Isroilga garovga olingan erkaklar va halok bo‘lgan asirlarning qolgan jasadlari topshirilishi mumkin. Baydenning ta’kidlashicha, kelishuvning uchinchi bosqichi G‘azoning urushdan keyingi tiklanishiga qaratiladi.
16-yanvar kuni Netanyaxu ofisi HAMASni sulhni buzishga urinishda, yangi talablar qo‘yishda ayblagandi.
“HAMAS kelishuvga erishishga to‘sqinlik qiluvchi inqirozni so‘nggi lahzada keltirib chiqarib, bitimdan voz kechmoqda. HAMAS so‘nggi daqiqada bosim o‘tkazish maqsadida vositachilar va Isroil bilan kelishilgan aniq shartlardan bosh tortmoqda”, degan edi Netanyaxu idorasi.
Falastinning HAMAS guruhi bunga javoban o‘t ochishni to‘xtatish to‘g‘risidagi bitimga sodiqligini ma’lum qilgandi. Ma’lumotni harakatning yuqori martabali vakili Izzat al-Rashik tasdiqlagan.
Isroil hukumatining ma’lumotlariga ko‘ra, G‘azo sektorida HAMASning asirligida 98 kishi qolmoqda, ularning to‘rt nafari 2014-2015-yillarda asirga olingan. Kamida 34 kishi halok bo‘lgan deb hisoblanmoqda, ularning ba’zilari 2023-yil 7-oktyabrda o‘ldirilgan.
Izoh (0)