Isroil mudofaa kuchlari HAMAS nazoratidagi G‘azo sektorining markaziy va janubiy qismlarida quruqlikdagi operatsiyani qayta boshladi. Bu haqda Isroil armiyasi matbuot xizmati xabar berdi.
Quruqlikdagi harakatlar doirasida Isroil harbiylari nazoratni Netsarim yo‘lagi markaziga kengaytirdi. Mazkur yo‘lak G‘azoning shimoliy va janubiy qismlarini ajratib turadi. Isroil armiyasi operatsiyaning maqsadi xavfsizlik zonasini kengaytirish, G‘azoning shimoliy va janubiy qismlari o‘rtasida bufer zonasini yaratish deb atadi.
Armiya Isroil davlati fuqarolarini himoya qilish uchun G‘azodagi terrorchi tashkilotlarga qarshi kurashni davom ettiradi, deya ta’kidladi Isroil mudofaa kuchlari.
Isroil avvalroq G‘azoga aviahujumlarni qayta tiklagan edi
18-martga o‘tar kechasi Isroil armiyasi G‘azoga havodan zarbalar berishni qayta tikladi. HAMAS nishonga olinishi aytilgan hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari 560 dan ortiq kishi jarohatlangan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan.
Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilganini aytgan.
HAMAS so‘nggi 24 soat ichida kuchlarimizning og‘irligini his qildi, men sizni va ularni ishontirib aytmoqchimanki, bu faqat boshlanishi. Biz urushdagi barcha maqsadlarimizga erishish uchun kurashishda davom etamiz — barcha garovga olinganlarni ozod qilish, HAMASni yo‘q qilish va G‘azo Isroilga tahdid solmasligiga va’da, degan Netanyaxu.
Shuningdek, u muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yuklagan. Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan.
Izoh (0)