HAMAS halok bo‘lgan to‘rt nafar garovdagilarning jasadini Isroilga topshirdi. Bu haqda Al Jazeera xabar berdi.
33 yoshli Shiri Bibas va uning o‘g‘illari (2 yoshli Kfir va 5 yoshli Ariel), shuningdek, 83 yoshli Oded Lifshitsning jasadi Qizil xochga berilgan. Ularning barchasi Isroilning G‘azo sektoridagi havo hujumlari oqibatida halok bo‘lgani aytilmoqda.
Jasad topshirilgan joyda — G‘azo sektori janubidagi Xon Yunus shahrida minglab odamlar to‘plangan. Jasadlar solingan tobutlarni allaqachon qabul qilib olgan Isroil harbiylari keyinroq ravvin boshchiligida marosimni o‘tkazadi, so‘ngra jasadlarni Tel Avivdagi “Abu Kabir” milliy sud-tibbiyot markaziga olib boradi.
2023-yil 7-oktyabr kuni HAMAS jangchilari ularning oilasi uyiga bostirib kirganida Kfir Bibas to‘qqiz oylik, akasi Ariel esa to‘rt yoshda edi. Ularning otasi Yarden Bibas o‘sha kuni o‘g‘irlab ketilgan, ammo u oila a’zolaridan alohida hibsda saqlangan. Erkak fevral oyida HAMAS va Isroil o‘rtasidagi kelishuvning birinchi bosqichi doirasida ozod qilingan.
Isroil rasmiylari garovga olinganlarning o‘limi hujum bilan bog‘liq emasligini ta’kidlamoqda. 20-fevral holatiga ko‘ra, HAMAS 19 nafar tirik qolgan isroillik garovga olinganlarni ozod qilgan. 22-fevralda olti kishining ozod qilinishi kutilmoqda, 2-martga qadar esa kelishuvning birinchi bosqichi tugagach, yana to‘rt kishining jasadi topshiriladi.
Izoh (0)