G‘azo sektorida o‘t ochishni to‘xtatish e’lon qilinganidan so‘ng Isroil armiyasining hujumlari oqibatida 123 nafar falastinlik halok bo‘ldi, yana 270 nafari jarohatlandi.
G‘azodagi Fuqaro mudofaasi xizmatining ma’lum qilishicha, eksklavning barcha shaharlari bombardimon qilingan. Hujumlar oqibatida halok bo‘lganlar orasida 33 nafar bola va 33 nafar ayol bor.
Isroil va HAMAS o‘t ochishni to‘xtatish bitimini imzoladi
Bitimning birinchi bosqichida HAMAS Isroil tomoniga 33 nafar garovga olinganlarni topshiradi, ularning aksariyati tirik deb taxmin qilinmoqda. Bular asosan ayollar, bolalar, keksalar, bemorlar va yaradorlardir. Bunga javoban Isroil yuzlab falastinlik mahbuslarni qamoqdan ozod qiladi.
Kelishuv shartlariga ko‘ra, Isroil armiyasi G‘azo sektori hududlarining aksariyat qismidan chiqib ketadi, faqatgina G‘azo sektori va Misr o‘rtasidagi Filadelfiya yo‘lagida, shuningdek, Falastin eksklavi va Isroil chegarasidagi maxsus bufer hududida harbiy mavjudligini saqlab qoladi. G‘azoning tinch aholisi o‘z uylariga, jumladan, janglar tufayli eng ko‘p zarar ko‘rgan shimoliy hududlarga ham qaytish imkoniyatiga ega bo‘ladi.
O‘n oltinchi kuni bitimning ikkinchi bosqichi bo‘yicha muzokaralar boshlanadi. Bu bosqichda Isroilga garovga olingan erkaklar va halok bo‘lgan asirlarning qolgan jasadlari topshirilishi mumkin. Baydenning ta’kidlashicha, kelishuvning uchinchi bosqichi G‘azoning urushdan keyingi tiklanishiga qaratiladi.
Isroil bosh vaziri Binyamin Netanyaxu hukumatdagi koalitsiyasining ultra o‘ng qanot a’zolariga G‘azodagi urushni davom ettirishga va’da berdi.
U bitimning birinchi bosqichidan so‘ng buni amalga oshirishni aytdi.
Manbalarga ko‘ra, Netanyaxuning bir qator hamkorlari G‘azoda o‘t ochishni to‘xtatish bo‘yicha kelishuvga hali erta deb hisoblagan. Ular koalitsiyasidan chiqish va “hukumatni ag‘darish” bilan tahdid solishgan. Buni Isroil milliy xavfsizlik vaziri va “Otzma Yehudit” partiyasi rahbari Itamar Ben-Gvir ochiq aytgan.
Moliya vaziri Betsalel Smotrich esa hukumatda qolish uchun shart qo‘ygan. U “to‘liq g‘alabaga erishmaguncha” urushni “yanada kuchliroq, to‘liq qudrat va yangi shaklda” davom ettirishdan iborat. Aynan shu vazirlar G‘azo sektori aholisiga insonparvarlik yordami yetkazib berishni to‘xtatishga chaqirgandi. Ben-Gvir shu yo‘l bilan HAMASni taslim bo‘lishga undashni mo‘ljallagan. Smotrich esa Falastin harakati isroillik garovga olinganlarni ozod qiladi, deb umid qilgan.
Vazirlarning mazkur bayonotlari tufayli AQSH va Yevropa ittifoqi ularga sanksiya qo‘llashni ko‘rib chiqqan, biroq bu natija bermagan.
Izoh (0)