Volkswagen ishchilari uchun tayyorlanadigan hamda mahalliy supermarketlarda sotiladigan VW Currywurst sosiskalari rasmiy ravishda kompaniyaning eng ommabop mahsulotiga aylandi.
Ushbu sosiskadan 8 milliondan ortiq sotilgani biz uchun yangi rekord, deya ta’kidladi konsernning kadrlar bo‘yicha rahbari Gunnar Kilian.
Germaniyaliklar uchun sevimli taomlardan biri hisoblangan Currywurst kolbasa mahsulotlari, pomidor sousi va turli ziravorlar aralashmasidan iboratdir. O‘tgan yili Volkswagen ushbu mahsulotdan 8,5 million dona sotdi. Bu 2023-yildagiga nisbatan 200 mingtaga ko‘proq.
Currywurst 1973-yildan beri kompaniyaning maxsus zavodida ishlab chiqariladi. Uning retsepti faqat bir nechta xodimga ma’lum.
2021-yili mazkur mahsulotning ahamiyatini ko‘rsatadigan voqea yuz berdi. O‘shanda Volkswagen Currywurst’ni menyudan chiqarib tashlagach, ishchilar norozilik bildirdi. Vaziyatga hatto Germaniyaning sobiq kansleri Gerhard Shryoder aralashib, sosiskani “malakali ishchining energiya manbai” deb atadi. Alal-oqibat, kompaniya rasmiylari xato qilganini tan olib, uni menyuga qaytargan.
Ammo bu konsern uchun deyarli yagona quvonarli xabar bo‘lib turibdi. Yillik hisobotga ko‘ra, Volkswagen’ning sof daromadlari 30,6 foizga qisqargan, bunga ishlab chiqarish xarajatlarining oshishi va Xitoy bozoridagi savdo hajmining kamayishi sabab bo‘ldi.
Bundan tashqari, kompaniya 2024-yili Germaniya kasaba uyushmalari bilan uzoq davom etgan nizo bo‘yicha kelishuvga erishdi. Unga binoan Volkswagen 2030-yilgacha 35 ming ish o‘rnini qisqartiradi.
Volkswagen moliyaviy direktori Arno Antlitzning ta’kidlashicha, ular “xarajatlarni muntazam kamaytirish va rentabellikni oshirish”ga e’tibor qaratmoqda. Biroq global siyosiy beqarorlik va Donald Trampning Yevropa ittifoqi avtomobillariga 25 foizli boj joriy etish haqidagi tahdidlari konsern uchun jiddiy xavf tug‘diryapti.
Izoh (0)