Germaniya migratsiya idoralari Suriya fuqarolarining boshpana so‘rash arizalarini ko‘rib chiqishni vaqtincha to‘xtatdi. Bu ma’lumotni GFR IIV matbuot kotibi Sonya Kok tasdiqladi.
“BAMF har bir holatni juda sinchkovlik bilan kuzatib boradi. Bu kelib chiqish mamlakatidagi vaziyatni baholashni ham o‘z ichiga oladi”, dedi Kok.
Uning ta’kidlashicha, agar ariza beruvchining mamlakatidagi vaziyat noaniq bo‘lsa, migratsiya idorasi boshpana berish to‘g‘risidagi qarorni kechiktirish huquqiga ega. Kokga ko‘ra, aynan ushbu holat hozir Suriyaga tegishli. Uning baholashiga ko‘ra, amalda suriyaliklarning arizalari endi “pastga surilib, boshqa boshpana so‘rovlariga ustuvorlik beriladi”.
Nashrning aniqlik kiritishicha, BAMF Suriya fuqarolarining arizalari bo‘yicha boshpana berish bo‘yicha biron-bir qaror qabul qilishni to‘xtatgan. Vazirlik vakili mamlakatdagi vaziyatni chalkash va oldindan aytib bo‘lmaydigan holat deb atadi.
IIV vakilining ta’kidlashicha, nazariy jihatdan Germaniyada istiqomat qilayotgan suriyaliklarning maqomi bekor qilinishi yoki uzaytirilmasligi mumkin. Bunday holatda ular Germaniyani tark etishlari kerak bo‘ladi. Biroq bu Suriyadagi vaziyatning “qisqa muddatli istiqbolda” rivojlanishiga bog‘liq.
“Suriyadagi vaziyat oxir-oqibat qochoqlarning yangi ko‘chishiga olib keladimi yoki aksincha, vaziyat barqarorlashadimi, uzoq muddatli istiqbolda ko‘chib ketgan shaxslar hamda qochoqlar uchun vataniga qaytish imkoniyati paydo bo‘ladimi, hozircha noma’lum”, deb ta’kidladi Germaniya TIV vakili.
BAMF tomonidan qabul qilingan qaror suriyaliklardan boshpana so‘rab ko‘rib chiqilayotgan 47 mingta arizaga taalluqli. Shundan 46 mingga yaqini dastlabki arizalardir.
Germaniya IIV ma’lumotlariga ko‘ra, 2024-yil oktyabr holatiga ko‘ra mamlakatda qariyb 975 ming nafar Suriya fuqarosi bo‘lgan.
Avstriya deportatsiyaga tayyorlanmoqda
Suriyaliklarning boshpana so‘rab bergan arizalari bo‘yicha xuddi shunday qaror 9-dekabr kuni Avstriya hukumati tomonidan qabul qilindi. Mamlakat IIV ma’lumotlariga ko‘ra, 7300 ga yaqin dastlabki arizalarning ko‘rib chiqilishi to‘xtatilgan. Shuningdek, ilgari ma’qullangan barcha arizalar qayta tekshirilishi lozim. Suriya oilalarini birlashtirish dasturi ham to‘xtatiladi.
“Shu munosabat bilan, men vazirlikka Suriyaga repatriatsiya va deportatsiya qilish bo‘yicha tartibli dastur tayyorlashni topshirdim”, dedi Avstriya IIV rahbari Gerxard Karner.
Suriyalik qochqinlarning boshpana so‘rab bergan murojaatlarini ko‘rib chiqishni to‘xtatish to‘g‘risidagi qarorlarni Buyuk Britaniya, Daniya, Italiya, Niderlandiya, Norvegiya, Shveysariya va Shvetsiya kabi boshqa Yevropa mamlakatlari ham qabul qilgan yoki qabul qilishga tayyorlanmoqda. Fransiya hukumati ham ham ushbu loyihani istisno etmagan.
Izoh (0)