Germaniya parlamentining quyi palatasi uchdan ikki qismdan ko‘proq ovoz bilan Germaniya Konstitutsiyasiga mamlakatga ko‘proq qarz olish va qurolli kuchlar va infratuzilmaga katta miqdorda sarmoya kiritish imkonini beradigan o‘zgartirish kiritishni ma’qulladi.
Ovoz berish tarixiy deb atalmoqda. Bundestag qarori Yevropa mudofaasining butun kelajagiga va Ukrainani qo‘llab-quvvatlashga ta’sir qilishi kutilmoqda.
Germaniyaning bo‘lajak kansleri Fridrix Mersning aytishicha, bu o‘zgarishlar Germaniyaning “Rossiyaning Yevropaga qarshi tajovuzkor urushi” oldidagi pozitsiyasini mustahkamlash uchun zarur.
Mersning rejalarida harbiy xarajatlarni davlat qarzlariga cheklovdan chiqarish, shuningdek, 500 milliard yevrodan ortiq infratuzilma fondini yaratish ko‘zda tutilgan.
O‘zgartirishlar uchun Bundestagning 513 a’zosi ovoz bergan, qolgan 207 nafari qarshi chiqqan.
Mersning konservativ partiyasi XDS/XSS va so‘l markazchi sotsial-demokratlar parlamentda ovozlarning uchdan ikki qismiga ega bo‘lish uchun so‘nggi daqiqada o‘z takliflariga “Yashillar” partiyasining talablarini kiritishga majbur bo‘lgan.
Endi qonun loyihasi Germaniyaning 16 ta yeri vakili bo‘lgan yuqori palata — Bundesratga yuboriladi va u yerda juma kuni ovozga qo‘yiladi.
Ikki yirik partiya — XDS/XSS va sotsial-demokratlar yetakchilari yuqori palata konstitutsiyaviy o‘zgarishlarni qiyinchiliksiz qabul qilishini kutmoqda.
Izoh (0)