Fransiya Tashqi ishlar vazirligi 2012-yilda diplomatik munosabatlar uzilganidan keyin ilk marta Suriyaga to‘rtta diplomat yuborishga qaror qildi. 17-dekabr kuni ertalab diplomatik missiya Suriyaning yangi hukumati bilan “dastlabki aloqalarni o‘rnatish” uchun Fransiya elchixonasi joylashgan Damashqqa yetib keldi.
Elchixonaga kelgan diplomatlar haqida AFP muxbiri xabar berdi. Fransiya TIV rahbari Jan-Noel Barro diplomatik aloqalardan maqsad Fransiyaning Suriyadagi “ta’sirini qaytarish” va “aholining gumanitar ehtiyojlarini baholash” ekanligini aytdi. Hozirda Buyuk Britaniya va Germaniya ham yangi hukumatlar bilan munosabatlarni normallashtirishni muhokama qilmoqda.
Fransiya Suriya bilan diplomatik munosabatlarni 2012-yilda — mamlakatda fuqarolar urushi boshlanganidan bir yil o‘tib uzgan, shuningdek, xavfsizlik nuqtai nazaridan Damashq elchixonasini yopgan edi. Shu bilan birga, Suriyada yuzlab fransuz fuqarolari bo‘lgan va hozir ham qolmoqda. Ular bilan bog‘liq masalalar Ruminiya elchixonasi va Fransiyaning Bayrutdagi diplomatik vakolatxonasi orqali hal qilingan.
Fransiya prezidenti Emmanuel Makron Suriya prezidenti Bashar Asad iste’fosini “varvarlar davlatining qulashi” deya izohlagandi. Fransiya TIV, agar Suriya jamiyatining barcha vakillari manfaatlari hisobga olinsa, “siyosiy o‘tish”da Suriya muxolifatiga yordam berishga tayyorligini bildirdi.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
10-dekabr kuni Idlib shahrida qo‘zg‘olonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televidenie murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)