Germaniya hukumati Suriyaga yordam ko‘rsatish bo‘yicha bir nechta loyihalarda ishtirok etadi. Ushbu maqsadlar uchun jami 60 million yevro ajratiladi. Bu haqda Germaniya iqtisodiy hamkorlik va taraqqiyot vaziri Svenya Shuls xabar berdi.
Bu mablag‘ bevosita Suriya hukumatiga yo‘naltirilmaydi. Shulsening aytishicha, Bashar Asad rejimi qulashidan so‘ng Suriyadagi gumanitar vaziyat “fojiali” ahvolga keldi. Mamlakat aholisining 90 foizi qashshoqlikda yashaydi va gumanitar yordamga muhtoj. 2011-yildan beri davom etib kelayotgan fuqarolar urushi davomida mahalliy infratuzilmaning katta qismi vayron bo‘lgan.
Berlin ishtirok etadigan Suriyani tiklash loyihalari nodavlat va xalqaro tashkilotlar orqali amalga oshiriladi. Maktablarni ta’mirlash bilan shug‘ullanuvchi BMT Bolalar jamg‘armasiga (YUNISEF) 25 million yevro tushishi kerak. Bundan tashqari, mablag‘lar urushda jarohatlangan bolalarga yordamga yo‘naltiriladi. Mahalliy maktablar ishini tashkil etishni qo‘llab-quvvatlash uchun 6 million yevro ajratiladi.
Yana 19 million yevro BMT Taraqqiyot dasturiga (UNDP) yo‘naltiriladi, u boshqa narsalar qatorida majburiy ko‘chirilganlar uchun ishlarni tashkil etish bilan shug‘ullanadi. BMTning Suriya ayollar huquqlarini himoya qilish bo‘yicha tashkilotlarini qo‘llab-quvvatlovchi jamg‘armasi 3 million yevro oladi, qolgan 7 million esa “aholining turli guruhlarini yarashtirish” bilan shug‘ullanuvchi mahalliy nodavlat tashkilotlarga ajratiladi.
Shulsening ta’kidlashicha, Berlin ayni paytda Suriyada hokimiyat “Hay’at Tahrir ash-Shom” (HTSH) islomiy guruhiga o‘tishi fonida Suriyada nima bo‘lishini oldindan aytib bera olmaydi.
“Ammo ijobiy rivojlanish imkoniyati mavjud va endi biz buni qo‘llab-quvvatlash uchun barcha imkoniyatlarni ishga solishimiz kerak. Biz o‘z umidlarimizni aniq ifodaladik: mafkura, diskriminatsiya va izolyatsiyadan xoli ta’lim tizimi. Agar rivojlanish to‘g‘ri yo‘nalishda bo‘lsa, biz boshqa sohalarda ham ko‘proq ish qilishga tayyormiz”, dedi Germaniya vaziri.
Germaniya qanday shartlar asosida Suriyani qo‘llab-quvvatlaydi?
Germaniya Tashqi ishlar vaziri Annalena Berbok Suriyani qo‘llab-quvvatlash rejasini taqdim etdi. Reja sakkiz banddan va Damashqqa yordam ko‘rsatish uchun Berlin ilgari surgan shartlardan tashkil topgan.
Mazkur shartlar orasida hokimiyatning tinch yo‘l bilan topshirilishi, chet el aralashuvisiz “Suriya ichki muloqoti”, mamlakatdagi ayollar, etnik va diniy ozchiliklar huquqlarini himoya qilish masalalari mavjud. Bundan tashqari, Germaniya Suriyaning yangi hukumatini Asad rejimi jinoyatlarini tergov qilishga va Suriya harbiy obyektlarida saqlanayotgan kimyoviy qurollarni xalqaro nazoratga topshirishga chaqirmoqda.
Dekabr oyi oxirida Abu Muhammad al-Juloniy nomi bilan tanilgan HTSH rahbari Ahmad ash-Sharaa mamlakatning yangi hukumati Rossiya bilan hamkorlikni davom ettirish istagini bildirgandi.
“Biz Rossiyaning Suriyadan chiqib ketishi mamlakatimiz bilan munosabatlariga putur yetkazishini istamaymiz”, degan al-Sharaa. U Damashqning Moskva bilan “strategik manfaatlari” borligini ta’kidlagan va Rossiyani “katta ahamiyatga ega bo‘lgan dunyodagi ikkinchi qudratli davlat” deb atagan.
Izoh (0)