“Katta yettilik” (G7) davlatlari Rossiya Ukraina bilan o‘t ochishni to‘xtatishdan voz kechsa, unga ittifoq a’zolari tomonidan yangi sanksiyalar qo‘llanilishi mumkinligini ma’lum qildi. Bu haqda Reuters G7 bayonoti loyihasiga asoslanib xabar bermoqda.
“G7 a’zolari Rossiyani teng shartlarda o‘t ochishni to‘xtatishga rozilik bildirish va unga to‘liq amal qilish orqali munosib javob qaytarishga chaqirdi”, deyiladi Buyuk Britaniya, Kanada, Fransiya, Germaniya, Italiya, Yaponiya va AQSHni o‘z ichiga olgan G7 davlatlari bayonotida.
Biroq ushbu loyiha hali mazkur mamlakatlar vazirlari tomonidan tasdiqlangani yo‘q.
Diplomatlar har qanday o‘t ochishni to‘xtatish kelishuviga qat’iy rioya qilish zarurligini ta’kidlab, buning uchun tegishli xavfsizlik mexanizmlari kerakligini alohida qayd etishgan.
“Ular har qanday o‘t ochishni to‘xtatish kelishuviga qat’iy amal qilish lozimligini ta’kidladilar hamda Ukrainaning yangi tajovuzkor harakatlarni bartaraf etishi va ulardan himoyalanishini kafolatlaydigan ishonchli va samarali xavfsizlik choralari zarurligini alohida qayd etdi”, deya xulosa qilingan bayonotda.
13-mart kuni dunyoning yettilik guruhi davlatlari tashqi ishlar vazirlari va AQSH prezidenti Donald Tramp Kanadada uchrashishi xabar qilingandi. Uchrashuvda Ukrainaga nisbatan yangilanayotgan tashqi siyosat masalalari muhokama qilinishi rejalashtirilgandi.
Izoh (0)