Isroilning Livanda shia harakati “Hizbulloh”ga qarshi harbiy amaliyoti boshlanganidan beri yuz mingga yaqin odam mamlakatdan qo‘shni Suriyaga qochib o‘tdi. Bu haqda BMTning qochqinlar bo‘yicha oliy komissari Filippo Grandi ma’lum qildi.
Grandining so‘zlariga ko‘ra, chegaraga kelayotgan odamlar oqimi to‘xtamayapti. BMTning qochqinlar bo‘yicha Oliy komissarligining qo‘shimcha qilishicha, tashkilot xodimlari Suriya chegarasidagi to‘rtta nazorat-o‘tkazish punktida yangi kelganlarga yordam berish uchun mahalliy hokimiyat va Qizil Yarim oy xodimlari tomonidan qo‘llab-quvvatlanmoqda. Aniqlanishicha, qochqinlarning 60 foizga yaqini suriyaliklar, qolgan 40 foizi livanliklardir.
Avvalroq Livan bosh vaziri Najib Mikati Isroilning mamlakat bo‘ylab yirik havo hujumlari boshlanganidan so‘ng, uylarini tashlab ketganlar soni bir millionga yaqinlashganini aytgan edi. U buni “Livan tarixidagi odamlarning eng katta ko‘chishi” deb atagan.
Isroilning “Hizbulloh”ga qarshi operatsiyasi
Isroil armiyasi ikki hafta oldin Germaniya, AQSH va boshqa bir qator mamlakatlarda terrorchi tashkilot deb topilgan “Hizbulloh”ga qarshi “maqsadli harbiy operatsiya” boshlagan edi. Isroil havo hujumlari natijasida guruh rahbari Hasan Nasrulloh va harakatning bir qator yuqori martabali qo‘mondonlari halok bo‘ldi. Shu bilan birga, Livan Sog‘liqni saqlash vazirligi ma’lumotlariga ko‘ra, Isroil havo hujumlari davomida yuzlab odamlar, jumladan, ayollar va bolalar halok bo‘lgan.
Izoh (0)