Toshkent amaliy fanlar universiteti xalqaro ilmiy-amaliy hamkorlikni rivojlantirishda davom etmoqda

2025-yil 13—14-mart kunlari Toshkent amaliy fanlar universitetida “Ijtimoiy-gumanitar fanlarning dolzarb masalalari va zamonaviy yondashuv” mavzusida xalqaro ilmiy-amaliy konferensiya bo‘lib o‘tdi. Tadbirda ijtimoiy-gumanitar fanlar sohasidagi yetakchi olimlar, mutaxassislar va amaliyotchilar ishtirok etib, ilmiy tadqiqotlarning dolzarb muammolari va ularning yechimlarini muhokama qildilar.

Konferensiya doirasida tilshunoslik, adabiyotshunoslik, tarix, ijtimoiy fanlar va madaniyatshunoslik sohalaridagi ilmiy yutuqlar, innovatsion g‘oyalar va xalqaro hamkorlik masalalari muhokama qilindi.

Tadbirda Malayziya, Germaniya, Latviya, Turkiya, Indoneziya, Hindiston, Ozarbayjon, Qozog‘iston, Qirg‘iziston, Tojikiston, Misr va boshqa davlatlardan taniqli olimlar, ekspertlar va oliy ta’lim muassasalari vakillari ishtirok etdilar.

Toshkent amaliy fanlar universiteti xalqaro ilmiy hamkorlikni kengaytirishga alohida e’tibor qaratadi. Bizning maqsadimiz – ilmiy-tadqiqot sohasida xalqaro aloqalarni mustahkamlash va ilmiy muhitni yanada rivojlantirishdir. Shu bois, universitetimiz xorijiy oliy ta’lim muassasalari va tadqiqot markazlari bilan faol hamkorlik olib bormoqda, deya ta’kidladi universitet rektori Abdusalom Umarov.

Shu tashabbuslar doirasida 10-martdan 24-martgacha Toshkent amaliy fanlar universitetida Malayziyaning Universiti Pendidikan Sultan Idris (UPSI) universiteti professorlari tashrif buyurishgan.

UPSI – Malayziyaning yetakchi pedagogika universitetlaridan biri bo‘lib, ta’lim va ilmiy tadqiqotlar sohasida yuqori malakali mutaxassislarni tayyorlashi bilan tanilgan.

Tashrif davomida malayziyalik professorlar talabalar va o‘qituvchilar uchun mahorat darslari, seminarlar va ilmiy muhokamalar tashkil etmoqdalar. Bu orqali ular o‘z tajribalari va innovatsion yondashuvlari bilan o‘rtoqlashib, xalqaro akademik hamkorlik imkoniyatlarini yanada kengaytirishga hissa qo‘shadilar.

Mazkur tashrif O‘zbekiston va Malayziya o‘rtasidagi ta’lim va ilm-fan sohasidagi hamkorlikni mustahkamlash uchun muhim qadamlardan biri bo‘ldi.

Reklama huquqi asosida.