AQSH prezidenti Donald Tramp Rossiya bilan munosabatlarni normallashtirish maqsadida Qo‘shma Shtatlarning Ukraina yo‘nalishidagi strategiyasini o‘zgartirmoqda hamda o‘tmishdoshlari olib borgan transatlantik aloqalarni mustahkamlash siyosatini rad etmoqda. Bu haqda Tramp maslahatchilariga tayanib, Axios portali xabar bermoqda.

Maslahatchilarga ko‘ra, G‘arb uzoq vaqt davomida Rossiyani o‘ziga qarshi qo‘yib, uni maxsus operatsiya boshlashga majbur qilgan. Tramp esa NATO Ukrainadagi mojaroni keltirib chiqargan degan fikrni ilgari surmoqda. Shuningdek, maslahatchilarning ta’kidlashicha, Trampning tanqidchilari uning jangovar harakatlarni to‘xtatish tarafdori bo‘lganini va Ukrainada Rossiyaga qarshi turish uchun yetarli kuch yo‘q deb hisoblagan nuqtai nazarini hech qachon tan olmaydilar.

Ular Trampning Ukraina va NATOga nisbatan qarashlari shakllanishiga sabab bo‘lgan ikkita voqeani ta’kidlamoqda. 2008-yil aprelida Buxarestdagi NATO sammitida Ukraina va Gruziyaga kelajakda alyansga a’zo bo‘lish va’da qilingani Rossiyaning noroziligiga sabab bo‘lgan.

2014-yil fevralida esa o‘sha paytdagi AQSH Davlat kotibi o‘rinbosari Viktoriya Nulandning AQSHning Ukrainadagi elchisi Jeffri Payett bilan telefon suhbati yozuvi oshkor bo‘lgan edi. Unda ular Ukrainadagi asosiy lavozimlarga nomzodlarni va Vashingtonning Rossiyaga qarshi siyosiy kuchlarga ko‘rsatadigan yordamini muhokama qilishgan. Portalning ta’kidlashicha, ushbu suhbat “AQSHning Ukraina siyosatiga chuqur aralashuvini” ko‘rsatgan.

Portalning qayd etishicha, Tramp davrida AQSH tashqi siyosatidagi burilish nuqtasi 24-fevralda BMT Xavfsizlik Kengashi tomonidan Ukraina mojarosi bo‘yicha neytral xususiyatga ega bo‘lgan Amerika rezolyutsiyasining qabul qilinishi bo‘ldi. Bunga qadar Vashington Yevropa davlatlari va Kiyev tomonidan tayyorlangan BMT Bosh Assambleyasining Rossiyaga qarshi rezolyutsiyalari loyihalarini qo‘llab-quvvatlashdan bosh tortgan edi.

AQSH Rossiya bilan munosabatlarga yondashuvni qayta ko‘rib chiqmoqda

AQSH prezidentining milliy xavfsizlik bo‘yicha maslahatchisi Mayk Uolts Fox News telekanali efirida Qo‘shma Shtatlar Rossiya bilan o‘zaro munosabatlarga yangicha yondashuvni shakllantirayotganini aytdi.

Biz Rossiya bilan munosabatlarimizni qayta ko‘rib chiqmoqdamiz. Birinchi qadam prezident Trampning Putin va Zelenskiy bilan suhbatlari, keyinchalik esa Ar-Riyodda bo‘lib o‘tgan muzokaralar bo‘ldi, dedi u.

Uoltsning qo‘shimcha qilishicha, Qo‘shma Shtatlar, shuningdek, “Amerika xalqi mamlakatga kiritilgan ulkan sarmoyalardan foyda olishi” uchun iqtisodiyot va muhim minerallar bo‘yicha Ukraina bilan hamkorlikni qanday yo‘lga qo‘yishini yangicha talqin qilmoqda.

Joriy yilning 18-fevral kuni Ar-Riyodda Rossiya va AQSH delegatsiyalarining uchrashuvi bo‘lib o‘tgan edi. Uning yakunlari bo‘yicha Rossiya prezidenti matbuot kotibi Dmitriy Peskov muzokaralarda munosabatlarni tiklash yo‘lida muhim qadam qo‘yilganini ma’lum qildi. Shu bilan birga, u ikki davlat o‘rtasidagi munosabatlarni normallashtirish uchun uzoq yo‘lni bosib o‘tish kerakligini ta’kidladi.