Fransiya qurolli kuchlari vaziri Sebastyan Lekornyu mamlakat Ukrainaga 195 million yevrolik qurol yuborishini aytdi. Bu mablag‘lar muzlatilgan Rossiya aktivlaridan olingan daromadlar hisobidan ajratiladi. Bu haqda La Tribune Dimanche xabar berdi.
Lekornyuning aytishicha, mablag‘ 155 millimetr kalibrli snaryadlar va Mirage 2000 qiruvchi samolyotlari uchun AASM boshqariladigan bombalarni yetkazib berishga yo‘naltiriladi. Vazir Ukrainaga eski harbiy texnikani, jumladan, AMX-10RC tanklari va VAB zirhli mashinalarini topshirishni tezlashtirishni va’da qildi.
2022-yil fevraldan buyon G‘arb mamlakatlarida Rossiyaning taxminan 300 milliard yevrosi muzlatib qo‘yilgan. Ularning 200 milliard yevrogacha bo‘lgan qismi dunyodagi eng yirik hisob-kitob va kliring tizimlaridan biri hisoblangan Belgiyaning Euroclear kompaniyasi hisobvaraqlarida saqlanmoqda.
Fransiya Yevropa ittifoqi davlatlariga Rossiyaning muzlatilgan aktivlaridan Ukraina xavfsizlik kafolatlarini ta’minlash uchun foydalanishni taklif qilgan. Rejaga ko‘ra, agar Rossiya tinchlik kelishuvini buzsa, ushbu aktivlar musodara qilinadi. Moskva esa bloklangan aktivlarni qaytarishni talab qilmoqda va ularning o‘zidan yoki ulardan olinadigan daromaddan foydalanishni o‘g‘rilik deb hisoblamoqda.
Buni faqat noqonuniy niyat sifatida qabul qilamiz. Agar bu rejani amalga oshirishga harakat qilinsa, u juda jiddiy sud va huquqiy oqibatlarga olib keladi, degan Rossiya prezidenti matbuot kotibi Dmitriy Peskov.
Izoh (0)