Россия Федерацияси кенгашининг халқаро ишлар қўмитаси раиси Константин Косачев АҚШ ва Украина расмийлари ўртасида келишилган ўт очишни тўхтатиш таклифига изоҳ бериб, ҳар қандай келишув АҚШ эмас, Россия шартлари асосида бўлишини айтди. Бу ҳақда Reuters хабар берди.
11 март куни Саудия Арабистонининг Жидда шаҳридаги музокараларда АҚШ Украина хавфсизлигини қўллаб-қувватлашни давом эттиришини маълум қилган. Бунга Украина АҚШнинг Россия билан можаросида 30 кунлик ўт очишни тўхтатиш таклифини қабул қилиши сабаб бўлган.
АҚШ Давлат котиби Марко Рубио АҚШ энди таклифни Россия қабул қилиши кераклиги, ваколат Москвада эканлигини айтган.
“Умидимиз шуки, россияликлар имкон қадар тезроқ “ҳа” деб жавоб беришади, шунда биз бунинг иккинчи босқичига, яъни ҳақиқий музокараларга ўта оламиз” , деган у.
Рубионинг айтишича, АҚШ “имкон қадар тезроқ” ҳам Россия, ҳам Украина билан тўлиқ келишувни хоҳлайди.
“Ҳар куни бу уруш давом этмоқда, одамлар ҳалок бўлмоқда, бу можародан ҳар икки томон ҳам зарар кўрмоқда”, деди у.
Россия президенти Владимир Путин тинчлик битимини муҳокама қилиш учун очиқлигини айтган, бироқ у ва унинг дипломатлари ўт очишни тўхтатишга қарши эканликларини ва Россиянинг “узоқ муддатли хавфсизлигини” таъминлайдиган келишувга эришишларини бир неча бор таъкидлаган.
Бундан ташқари, Путин Украина Россия даъво қилган ва қисман назорат қиладиган тўртта вилоятдан чиқиб кетмагунча уруш давом этишини айтган эди.
Константин Косачев ҳам буни қуйидагича изоҳлаган:
“Россиянинг Украинадаги позицияси яхшиланмоқда, шу сабабли энди вазият бошқача бўлади. Ҳар қандай келишувлар, муросага келиш зарурлигини тўла англаган ҳолда, Американинг эмас, балки бизнинг шартларимиз асосида бўлиши лозим. Бу ғурурланиш эмас, балки ҳақиқий келишувлар ҳали ҳам жанг майдонида ёзилаётганини тушунишдир. Буни Америка ҳам англаб етиши лозим”.
Маълумот учун, Саудияда АҚШ—Украина делегациялари ўртасидаги учрашув 9 соат давом этди. Якунда Украина 30 кунлик ўт очишни тўхтатиш таклифини қабул қилган.
Изоҳ (0)