Rossiya maxsus kuchlari Kursk viloyatida Ukraina bo‘linmalariga orqa tomondan zarba berish uchun gaz quvurlari ichida harakatlanmoqda. Harbiylar shu yo‘l bilan Kiyev egallab olgan bir qancha chegara viloyatlarini qaytarib olmoqchi. Bu haqda Associated Press xabar berdi.
Ukraina avgust oyida Rossiyaning Kursk viloyatiga transchegaraviy bostirib kirishni boshlagan. Bu Ikkinchi jahon urushidan beri Rossiya hududiga qilingan eng yirik hujum hisoblanadi. Bir necha kun ichida Ukraina bo‘linmalari 1000 kvadrat kilometr hududni, shu jumladan, strategik chegaradagi Suja shahrini egallab oldi va yuzlab rus harbiy asirlarini olib ketdi.
Kiyevga ko‘ra, operatsiya kelajakda tinchlik muzokaralariga erishish va Rossiyani Ukraina sharqidagi shafqatsiz hujumlaridan chalg‘itish maqsadida amalga oshirilgan. Hozirda Ukrainaning 10 minglab askari Rossiya va uning ittifoqchisi bo‘lgan Shimoliy Koreyaning 50 mingdan ortiq harbiylari qurshovida qolmoqda.
Asli ukrainalik, kremlparast blogerning yozishicha, rossiyalik operativlar ilgari Rossiya Yevropaga gaz yetkazib berish uchun foydalangan quvur ichida taxminan 15 kilometr (9 mil) masofani bosib o‘tgan. Bloger Yuriy Podolyak ta’kidlashicha, rus qo‘shinlarining bir qismi Suja shahri yaqinida Ukraina bo‘linmalariga orqa tomondan hujum qilishdan oldin bir necha kun davomida quvurda yashiringan.
Bu yerda quvur bo‘ylab yirik gaz uzatish va o‘lchash stansiyalari joylashgan bo‘lib, ular bir paytlar Rossiya tabiiy gazini Ukraina hududi orqali eksport qilishning asosiy yo‘nalishi hisoblangan.
Two Majors taxallusini qo‘llaydigan yana bir harbiy bloger Suja uchun shiddatli janglar ketayotgani, rus qo‘shinlari shaharga gaz quvuri orqali kirishga muvaffaq bo‘lganini aytgan. Ukraina bosh shtabi 8-mart kuni kechqurun Rossiyaning “diversiya va hujum guruhlari” Suja tashqarisida mustahkam o‘rin egallash uchun quvurdan foydalanganini tasdiqladi.
Rossiya qo‘shinlari “o‘z vaqtida aniqlangani”, Ukraina ularga raketa va artilleriya bilan javob bergani aytilmoqda.
Hozirda Rossiya maxsus kuchlari aniqlanib, harakatlanishi to‘sib qo‘yilib, ular yo‘q qilinmoqda. Dushmanning Sujadagi yo‘qotishlari juda yuqori, deyiladi bosh shtabning rasmiy xabarida.
Kurskka hujum
Izoh (0)