Ukraina qurolli kuchlari Rossiyaning turli hududlariga, jumladan, Moskvaga qarshi eng yirik dron hujumini amalga oshirdi. Rossiya Mudofaa vazirligi hisobotiga ko‘ra, 11-martga o‘tar kechasi Rossiya bo‘ylab jami 337 ta ukrain droni urib tushirilgan.
Moskva meri Sergey Sobyaninning ma’lum qilishicha, mahalliy vaqt bilan, taxminan, 4:30 dan 7:00 gacha shahar yaqinida 74 ta dron urib tushirilgan. Domodedovodagi “Miratorg” distribyutor markazining qo‘riqchisi dron qoldiqlari tushishi natijasida halok bo‘ldi. Dron avtomashinalar turar joyiga qulagan va yong‘in chiqib, 20 ta avtomobil yonib ketgan. Xodim mashina yaqinida bo‘lgan. Bundan tashqari, Vidnoye va Domodedovodagi hujumlar oqibatida uch kishi jarohat oldi.
Podmoskovye gubernatori Andrey Vorobyovning so‘zlariga ko‘ra, Ramenskoyedagi ko‘p qavatli uyga dron qoldiqlari tushib, 19-dan 22-qavatgacha bo‘lgan kamida yetti xonadon zarar ko‘rgan. U yerdan 12 kishi, jumladan, 3 nafar bola evakuatsiya qilingan.
Domodedovo stansiyasida dron qoldiqlari temir yo‘l infratuzilmasiga ham zarar yetkazgan. Qurbonlar yo‘q, lekin ta’mirlash ishlari olib borilmoqda va Moskvaga poyezdlar harakati kechikmoqda.
Jukovskiy va Domodedovo aeroportlarida esa “kovyor” rejimi joriy qilingan, bu parvozlar uchun vaqtinchalik cheklovlarni anglatadi.
Shot nashrining ma’lumotlariga ko‘ra, hujumda PD-2, “Rubaka” va “Lyutyy” turidagi dronlar qo‘llangan. Ular Chernihiv, Sumy va Dnepropetrovsk viloyatlaridan uchirilgan bo‘lib, 6–12 ta dronli guruhlarda harakatlangan. Bu usul orqali havo hujumidan mudofaa tizimlarini chalg‘itish maqsad qilingan.
Bungacha Moskvaga eng yirik dron hujumi 2023-yil 10-noyabrda bo‘lib o‘tgan edi, o‘shanda 32 ta dron urib tushirilgan.
Rossiya Mudofaa vazirligi hisobotiga ko‘ra, 11-mart kuni kechasi Rossiya bo‘ylab jami 337 ta ukrain droni urib tushirilgan, bu 2022-yil fevraldan beri rekord hisoblanadi. Xususan:
- Moskva viloyati – 91 ta,
- Kursk – 126 ta,
- Bryansk – 38 ta,
- Belgorod – 25 ta,
- Ryazan – 22 ta,
- Kaluga – 10 ta,
- Lipetsk va Orel – 8 tadan,
- Voronej – 6 ta,
- Nijegorod viloyati – 3 ta dron urib tushirilgan.
15-dekabr kuni Checheniston poytaxti Grozniy shahrida dronlar hujumi kuzatilgan edi. Ramzan Qodirov uchta dron hujum qilgani, ularning ikkitasi urib tushirilganini tasdiqlagan edi.
G‘arbiy Ukrainaga hujum
13-dekabr kuni Ukrainaning g‘arbiy hududlari keng ko‘lamli urush boshlanganidan beri Rossiya armiyasining eng ommaviy hujumiga duchor bo‘ldi. Ukraina prezidenti Vladimir Zelenskiyning aniqlik kiritishicha, birgina 13-dekabrga o‘tar kechasi Rossiya armiyasi Ukrainaga qarata 93 ta raketa, jumladan qanotli va ballistik raketalar, shuningdek, 200 ga yaqin dronlar uchirgan.
Izoh (0)