O‘zbekiston fuqarolari Rossiyada uy-joy sotib oluvchi norezidentlar bo‘yicha top uchlikka kirdi. Bu haqda “Izvestiya” xabar berdi.
Ko‘chmas mulk bozori bo‘yicha investitsion kompaniya — “Flip” rahbari Yevgeniy Shavnevning ma’lum qilishicha, 2024-yil sentyabridan buyon norezidentlarning uy-joy sotib olishi bo‘yicha bitimlar soni ortib bormoqda.
“Ayni paytda ular hissasiga umumiy savdoning 20 foizi to‘g‘ri keladi. Shundan 15 foizi O‘zbekiston fuqarolari, 21 foizi — Belarus, 18 foizi — Qozog‘iston, 10 foizi — Tojikiston, 10 foizi — Turkmaniston, 2 foizi — Xitoy fuqarolari”, degan u.
Norezidentlar, asosan, Moskva (65 foiz), Sankt-Peterburg (10 foiz) va Moskva viloyati (15 foiz) va Rossiyaning boshqa hududlaridan (10 foiz) uy-joy sotib olishga qiziqish bildirmoqda.
Qayd etilishicha, ular naqd pulga biznes yoki komfort-plyus toifali uy-joy majmuasidan kvartiralar sotib olmoqda. 70 foiz holatda uylar investitsiya sifatida emas, bir yildan besh yilgacha yashash maqsadida sotib olinadi.
Eng qimmat kvartiralarni ko‘proq Xitoy, Qozog‘iston va Ukraina fuqarolari sotib olmoqda. Ularning to‘lov qobiliyati Rossiya fuqarolariga qaraganda bir muncha yuqori.
Savdolarda xaridorlarning byudjeti
- 65 foiz holatda — 20 million rublgacha,
- 21 foiz holatda — 20 milliondan 50 million rublgacha,
- 14 foiz holatda — 50 million rubldan yuqori bo‘lgan.
“Hashamatli ko‘chmas mulkka nisbatan yuqori qiziqish ko‘pincha uni oddiy fuqarolar emas, balki biznes egalari sotib olishlari bilan izohlanadi”, deydi Yevgeniy Shavnev.
Rossiyadagi ko‘chmas mulklarni sotib olishga O‘zbekiston, Qozog‘iston, Belarus va boshqa MDH davlatlari fuqarolarining qiziqishi ortib borayotganini u iqtisodiy aloqalar mustahkamlanishi, migratsiya jarayonlari va Rossiyada biznesning kengayishi bilan izohladi.
Izoh (0)