10-mart kuni AQSH va Janubiy Koreya Freedom Shield (Ozodlik qalqoni 2025) mintaqaviy tahdidlarga qarshi mudofaa qobiliyatini mustahkamlash maqsadida qo‘shma harbiy mashg‘ulotlarini boshladi. Bu haqda Yonhap agentligi xabar bermoqda.
Mashg‘ulotlar Shimoliy Koreya tomonidan keladigan “harbiy tahdid”ga va Pxenyan bilan Moskva o‘rtasidagi chuqurlashib borayotgan harbiy hamkorlikka qarshi kurashishga qaratilgan.
Ta’kidlanishicha, AQSH hamda Janubiy Koreya qurolli kuchlarining o‘zaro moslashuvini oshirishga qaratilgan mashg‘ulotlar 10-21-mart kunlari davom etadi. Unda 19 mingga yaqin janubiy koreyalik harbiy xizmatchi ishtirok etadi. Mashg‘ulotlar doirasida 16 ta yirik dala operatsiyasini o‘tkazish rejalashtirilgan.
“Ozodlik qalqoni-2025” shu yilning yanvar oyida Donald Tramp AQSH prezidenti lavozimiga kirishganidan beri AQSH va Janubiy Koreya qurolli kuchlari o‘rtasidagi birinchi yirik harbiy mashg‘ulot bo‘ldi.
O‘z navbatida, Shimoliy Koreya markaziy telegraf agentligi (KCNA) mamlakat Tashqi ishlar vazirligi qo‘shma mashg‘ulotlarni “xavfli provokatsion harakat” sifatida qoralab chiqqanini ma’lum qildi.
Bayonotda ta’kidlanishicha, kuch ishlatish “xavfsizlikning yanada jiddiy inqirozi”ga olib kelishi mumkin va bu mashqlar “tasodifiy o‘q uzilgan taqdirda Koreya yarim orolida jismoniy to‘qnashuvga olib kelishi mumkin bo‘lgan xavfli provokatsiya” hisoblanadi.
Avvalroq, Xitoy, Rossiya va Eron mart oyining birinchi yarmida Eronning Chobahor porti yaqinidagi akvatoriyada “Xavfsizlik bog‘i-2025” qo‘shma harbiy-dengiz mashg‘ulotlarini o‘tkazilishi ma’lum qilingandi.
Izoh (0)