Polsha bosh vaziri Donald Tusk mamlakatda barcha erkaklar uchun harbiy tayyorgarlikni majburiy qilish ustida ish olib borilayotganini e’lon qildi. U bu haqda Polsha parlamentida, Rossiya tomonidan ortib borayotgan tahdid sharoitida mamlakat xavfsizligini ta’minlash chora-tadbirlari haqidagi majlisda ma’lum qildi.
Biz yil oxiriga qadar urush yuz bergan taqdirda Polshadagi har bir balog‘at yoshiga yetgan erkakning harbiy tayyorgarlikdan o‘tishini nazarda tutuvchi modelni ishlab chiqishga harakat qilamiz. Shuningdek, shakllantirilgan zaxira yuzaga kelishi mumkin bo‘lgan tahdidlarga mos ravishda tashkil etiladi, dedi Tusk Seymda so‘zga chiqib.
Uning ta’kidlashicha, hozirda Ukraina armiyasi 800 ming askardan iborat, Rossiya armiyasi esa 1,3 million atrofida. Polsha armiyasi, zaxiradagilar bilan birga, 200 mingdan 500 minggacha oshirilishi kerak, deya qo‘shimcha qildi u.
Biz hamma narsani to‘g‘ri tashkil qilib bir nechta usullardan foydalana olamiz. Bu zaxiradagi harbiylarni jalb qilishni hamda armiyaga bormaydiganlar urush chog‘ida to‘laqonli va malakali askarga aylanishi uchun intensiv tayyorgarlikdan o‘tishini anglatadi, dedi bosh vazir.
Tuskning ta’kidlashicha, ayollar ham harbiy tayyorgarlikdan o‘tishi mumkin, ammo “urush hanuz asosan erkaklarning ishi bo‘lib qolmoqda”.
Bosh vazir, shuningdek, Fransiyaning yadro himoya soyabonini butun Yevropaga yoyish taklifini hukumat sinchkovlik bilan o‘rganayotganini ma’lum qildi.
“Avvalo, bu taklif yadro qurolini boshqarish nuqtayi nazaridan nimani anglatishini batafsil bilishni istayman”, dedi u.
Tusk Ukraina o‘zining yadro arsenalidan voz kechganidan keyin hujumga uchraganini eslatib, Varshava, garchi bu uzoq vaqt talab qilsa ham, o‘z yadro quroliga ega bo‘lishni xohlashini ta’kidladi.
Bugungi kunda o‘z yadro arsenalimiz bo‘lsa, ancha xavfsizroq bo‘lishimiz aniq, bu shubhasiz. Biroq bu yo‘l juda uzoq va bunga erishish uchun kelishuv zarur bo‘ladi, dedi u.
Joriy yilda Polsha mudofaa uchun YIMning 4,7 foizini sarflashni rejalashtirmoqda, bu NATOdagi eng yuqori ko‘rsatkichdir.
Tusk parlamentda bu xarajatlarni YIMning 5 foizigacha oshirish kerakligini aytdi.
Bundan avval prezident Anjey Duda mudofaa xarajatlarini YIMning 4 foiz darajasida majburiy qilish uchun konstitutsiyaga o‘zgartirish kiritishni taklif qilgan edi.
Bosh vazir, shuningdek, Polshaning piyodalarga qarshi minalarni qo‘llashni taqiqlovchi Ottava konvensiyasidan, shuningdek, kasetli bombalardan foydalanishni taqiqlovchi Dublin konvensiyasidan chiqishini qo‘llab-quvvatlashini bildirdi.
Polsha 2022-yilda Rossiya qo‘shni Ukrainaga to‘laqonli bostirib kirganidan keyin mudofaa xarajatlarini keskin oshirdi. Mamlakat AQSH bilan taxminan 20 milliard dollarlik harbiy texnika yetkazib berish bo‘yicha shartnomalar imzoladi. Varshava shuningdek, Janubiy Koreya bilan K2 tanklari va FA-50 yengil jangovar samolyotlarini sotib olish bo‘yicha shartnomalar imzolagan.
AQSH prezidenti Donald Tramp Ukrainaga harbiy texnika yetkazib berishni to‘xtatish to‘g‘risida qaror qabul qilganidan so‘ng, polyaklar o‘z kelajakdagi xavfsizligidan tobora ko‘proq xavotirlanmoqda. Polyaklarning aksariyati Ukrainani qo‘llab-quvvatlash o‘zlarining xavfsizlik manfaatlariga mos kelishiga ishonadi.
Izoh (0)