Ukraina Qurolli kuchlari bosh qo‘mondoni Aleksandr Sirskiy Sumi va unga chegaradosh Rossiyaning Kursk viloyatlaridagi vaziyat nazorat ostidaligini ma’lum qildi. Bu haqda mahalliy nashrlar xabar bermoqda.
“Men hozir Kursk kuchlar guruhi operatsion zonasida ishlamoqdaman. Sumi-Kursk chegarasidagi vaziyat Ukraina mudofaa kuchlari nazorati ostida qolmoqda. Rossiya propagandasi tez-tez tilga oladigan chegaradagi bir qancha aholi punktlari endi mavjud emas – agressorning o‘q yomg‘iri ostida butunlay yo‘q qilingan,” dedi bosh qo‘mondon.
Uning so‘zlariga ko‘ra, Rossiya bu hududga katta harbiy kuch, jumladan, Shimoliy Koreya piyoda qo‘shinlarini joylashtirgan bo‘lsa-da, og‘ir yo‘qotishlarga uchramoqda.
“Faqat so‘nggi to‘rt kunning o‘zida Plekhovo yaqinidagi janglarda dushman deyarli butun bir piyoda batalyonini yo‘qotdi,” dedi u.
Sirskiyga ko‘ra, rus armiyasining diversiya va razvedka guruhlari hamda Ukraina hududiga kirishga uringan kichik piyoda bo‘linmalari muvaffaqiyatli qaytarilmoqda. Qayd etilishicha, bunga “puxta tayyorlangan mudofaa tizimi” yordam beryapti.
“Men kuchlarimizni qo‘shimcha resurslar, jumladan, elektron urush tizimlari va dronlar bilan quvvatlash bo‘yicha qaror qabul qildim. Hozir Kursk yo‘nalishidagi bo‘linmalarimiz uchun qurshovga tushish xavfi yo‘q. Ukraina qo‘shinlari kuchli mudofaa pozitsiyalarini saqlab qolish uchun samarali harakatlanmoqda,” dedi Sirskiy.
Avvalroq Ukraina Davlat chegara xizmati vakili Andriy Demchenko Rossiya kuchlari Sumi viloyatidagi Novenke qishlog‘i yaqinida kuch to‘plashga urinayotgani haqida ma’lum qilgandi. Bu hudud Ukraina armiyasi ta’minot yo‘llarini izdan chiqarish imkonini beradi. Shu bois strategik ahamiyatga ega.
Izoh (0)