O‘zbekiston Butunjahon sayyohlik tashkilotining Sayyohlarni himoya qilish xalqaro kodeksiga rasman qo‘shildi.
Qayd etilishicha, bu bilan mamlakat turizm sohasidagi xalqaro standartlarga va sayohatchilar huquqlarini himoya qilishga bo‘lgan sodiqligini yana bir bor tasdiqladi. Ushbu qaror so‘nggi yillarda barqaror o‘sish ko‘rsatayotgan va jahon miqyosida tan olinayotgan mamlakat turizm sohasini rivojlantirishda muhim qadam bo‘ldi.
Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov “Sayyohlarni himoya qilish xalqaro kodeksi COVID-19 pandemiyasidan so‘ng sayohatlarga bo‘lgan ishonchni qayta tiklashga qaratilgan uyg‘unlashtirilgan tizim ekanini ta’kidlagan. O‘zbekiston ushbu kodeksga amal qilish orqali barcha sayyohlar uchun yanada xavfsiz va ishonchli sayohat muhitini yaratishni maqsad qilgan.
BMT Turizm tashkiloti tomonidan ishlab chiqilgan Sayyohlarni himoya qilish xalqaro kodeksi sayyohlarning xavfsizligi, huquq va manfaatlarini ta’minlashga, shuningdek turizmning barqaror rivojlanishiga ko‘maklashishga qaratilgan tamoyillar va tavsiyalar majmuasi.
Ushbu hujjatga qo‘shilish orqali O‘zbekiston mehmondo‘stlik sohasidagi ilg‘or tajribalarni joriy etishga va chet ellik mehmonlar uchun qulay sharoitlar yaratishga tayyorligini tasdiqlaydi.
O‘zbekistonga 2024-yilda jami 8,2 mln nafar chet el fuqarolari turistik maqsadlarda tashrif buyurgan.
Shundan:
- ayollar – 4 077,1 ming nafar (49,8 foiz)
- erkaklar – 4 104,3 ming nafar (50,2 foiz)
Maʼlumot uchun, O‘zbekistonga 2023-yilning yanvar—dekabr oylarida 6,6 mln nafar chet el fuqarolari turistik maqsadlarda tashrif buyurgan.
Tashrifi oshib borayotgan sayyohlar
2024-yilning boshidan turistlar oqimi har oy salmoqli oshib bormoqda. Yevropa ittifoqi davlatlaridan 2024-yilning yanvar oyida 4 601 nafar fuqaro turistik maqsadda O‘zbekistonga tashrif buyurgan. Yanvar-mart oylarida jami 1 mln 519,3 ming nafar chet el fuqarolari turistik maqsadlarda kelgan.
5 oyda esa 2,8 milliondan ortiq chet el fuqarolari turistik maqsadda tashrif buyurgan. Shularning, 10,6 ming nafari AQSHdan kelgan.
6 oyga kelib esa 3,5 milliondan ortiq chet el fuqarolari turistik maqsadda tashrif buyurdi. 1-oktyabrgacha esa jami 5,7 mln nafar keldi.
Izoh (0)