Joriy yil 10-mart kuni Parij shahrida “Ilm-fan va taʼlim: O‘zbekiston – Fransiya ko‘prigi” mavzusidagi qo‘shma konferensiya o‘tkazildi. “Daryo” fotomuxbiri anjumandan suratlar oldi.
O‘zbekiston prezidenti Shavkat Mirziyoyev 11—13-mart kunlari davlat tashrifi bilan Fransiyada bo‘ladi. Safar oldidan Parijda ikki davlat o‘rtasidagi hamkorlikni rivojlantirishga doir tadbirlar o‘tkazilmoqda.
Shunday anjumanlardan biri ilm-fan va taʼlimga bag‘ishlandi. Unda oliy taʼlim, fan va innovatsiyalar vaziri Qo‘ng‘irotboy Sharipov, Fransiya oliy taʼlim va tadqiqotlar vaziri Filipp Batist, ikki davlatning 30 nafardan ortiq OTMlari rahbarlari ishtirok etdi.
Tadbirda O‘zbekiston va Fransiya o‘rtasidagi ilmiy-texnik va taʼlim sohalarida hamkorlikni rivojlantirish haqida suhbatlashildi.
Anjuman doirasida qo‘shma taʼlim dasturlarini joriy etish, professor-o‘qituvchilar malakasini oshirish, talabalar almashinuvini kengaytirish bo‘yicha 20 dan ortiq oliygohlararo shartnomalar imzolandi.
Kunning ikkinchi yarmida O‘zbekiston va Fransiya o‘rtasidagi taʼlim, fan va innovatsiya sohasidagi hamkorlikni mustahkamlashga qaratilgan xalqaro konferensiya bo‘lib o‘tdi.
Anjuman doirasida Fransiya va O‘zbekiston oliy taʼlim muassasalari o‘rtasida ikki tomonlama hamkorlik shartnomalarini imzolash marosimi bo‘lib o‘tdi.
Tadbirning ikkinchi qismida uchta yo‘nalish bo‘yicha sessiyalar o‘tkazildi:
1. “O‘zbek-fransuz universiteti”mavzusidagi sessiyada O‘zbekiston va Fransiya universitetlari o‘rtasida taʼlim va madaniy hamkorlikning strategik istiqbollari muhokama qilindi.
2. “Ilmiy-texnik hamkorlik”mavzusidagi sessiyada innovatsion taʼlim, ijtimoiy-gumanitar fanlar va energetika sohalarida hamkorlik istiqbollari haqida suhbatlashildi.
3. “Madaniy meros va turizm”mavzusidagi sessiyada Fransiya va O‘zbekistonning moda sanoati, tarixiy merosni asrash va rivojlantirish borasidagi hamkorlik masalalariga eʼtibor qaratildi.
Izoh (0)