Avvalroq O‘zbekiston, Tojikiston va Qirg‘iziston 2031-yilgi Osiyo Kubogini birgalikda o‘tkazish bo‘yicha ariza yuborgani haqida xabar berilgandi. O‘zbekiston futbol assotsiatsiyasi birinchi vise-prezidenti Ravshan Ermatov bu haqda fikrlarini bildirib o‘tdi.
Osiyo kubogi mezbonligini qabul qilish imkoniyatlari haqida
Ravshan Ermatov Osiyo kubogi Osiyo qitʼasining eng nufuzli futbol turniri hisoblanishini aytdi.
“Shu sababli mezbonlikka daʼvogar mamlakatlar ko‘pchilikni tashkil etadi. Hozirda OFK arizalarni qabul qilmoqda. Keyingi bosqichda ularni tasdiqlaydi va rasman eʼlon qiladi. Imkoniyatlarni o‘rganib chiqish jarayoni shundan so‘ng boshlanadi. OFK maxsus inspeksiyassi daʼvogar mamlakatlar talablarga qanchalik mosligini aniqlaydi. Osiyo futbol konfederasiyasi qitʼamizning barcha hududlarida futbol yana-da rivojlanishi tarafdori. Ayni paytgacha milliy jamoalar o‘rtasidagi Osiyo kubogi aksariyat mintaqalarda bo‘lib o‘tgan. Markaziy Osiyo ushbu turnirga hozircha mezbonlik qilmagan. OFK bizning mintaqaga ham o‘zining eng katta musobaqasi mezbonligini taqdim etishiga umid bildiramiz”, — deydi u.
Osiyo kubogi mezbonlariga qanday talablar qo‘yiladi va ushbu mamlakatlar bunga tayyormi?
O‘FA birinchi vitse-prezidenti so‘nggi yillarda O‘zbekiston uchta yirik musobaqaga mezbonlik qilganini taʼkidladi.
“U-20 va U-23 Osiyo chempionatlari mezbonligiga nomzodimizni yuborganimizda dastlab OFK bizning qanchalik tayyor ekanligimiz borasida o‘ylandi. Keyinchalik barcha talablarni o‘z vaqtida va sifatli bajarganimizdan so‘ng hech qanday shubhaga o‘rin qolmadi. Mehmonxonalar, logistika, transport va boshqa yo‘nalishlar xalqaro standartlarga moslashtirildi. Hozir tashkiliy jihatdan OFK ishonchini qozonganmiz, deb o‘ylayman. Xalqaro maqomdagi stadionlarimiz ham bor. Lekin bizga sig‘imi kattaroq stadionlar kerak. Osiyo kubogining eng muhim o‘yinlarini qabul qilish uchun 40-50 ming kishilik stadionlar talab etiladi. Biz bu masalada bir qancha loyihalarni ko‘rib chiqyapmiz. Qo‘shnilarimiz ham barcha sharoitlarni taqdim etishga tayyor. Masalan, Qirg‘iz Respublikasi poytaxti Bishkekda 51 ming muxlisga mo‘ljallangan stadion qurilishi boshlab yuborilgan. Ishonchim komil, agar turnir bizga topshirilsa, Markaziy Osiyo tarixdagi eng yorqin forumlardan birini o‘tkaza oladi”, — degan Ravshan Ermatov.
Osiyo Kubogi mezbonligining biz uchun qanday ijobiy tomonlari bor?
Ermatov bu — birinchi navbatda futbol muxlislari uchun katta bayram bo‘lishini aytdi.
“Bugun Osiyo futboli rivojlanib boryapti. Eng yaxshi yulduz futbolchilar qitʼamizga kelib o‘ynashyapti va osiyoliklar Yevropaning eng yirik klublariga yo‘l olishyapti. Ularning hammasi Osiyo kubogida ishtirok etadi va yurtimiz maydonlarida unutilmas uchrashuvlar o‘tkazishadi. Qolaversa, milliy jamoamiz ham o‘z hududida yana-da yaxshiroq ishtirok etishga harakat qiladi. Qo‘shni qardosh mamlakatlar bilan munosabatlarimiz yana-da mustahkamlanadi. Zamonaviy futbol infratuzilmasi rivojlanadi va mutaxassislarimiz xalqaro tajribaga ega bo‘ladi. Butun dunyo futbol jamoatchiligi eʼtibori nafaqat futbolimizga, balki mamlakatlarimiz turizm salohiyati, madaniyati va tarixiga qaratiladi. O‘z navbatida futbol orqali yurtimiz ravnaqiga hissa qo‘shish imkoniyati paydo bo‘ladi. Barcha sohalar singassri futbol ham kompleks va keng qamrovli harakatlar bilangina rivojlanib boradi. Katta loyihalar taʼsiri eng kichik futbol maktablarigacha kirib boradi. Shu sababli, biz Osiyo kubogi kabi turnirni yurtimizga olib kelish uchun bor imkoniyatimizni ishga solamiz”, — deydi O‘FA birinchi vitse-prezidenti.
Izoh (0)