Statistika agentligi 2025-yil yanvarda O‘zbekiston tomonidan amalga oshirilgan eksport-import operatsiyalari qiymatini ma’lum qildi.
Joriy yil yanvarda mamlakat tashqi savdo aylanmasi hajmi 4,5 mlrd dollarni (7,1 foiz o‘sish) tashkil etdi. Shundan eksport ulushi 1,3 mlrd dollar (+14,1 foiz), import 3,2 mlrd dollar (+4,4 foiz). Tashqi savdo taqchilligi 1,9 mlrd dollar bo‘ldi.
Qayd etilishicha, yirik savdolar Xitoy (994,7 mln dollar), Rossiya (799,1 mln dollar), Qozog‘iston (313,5 mln dollar, Turkiya (212,9 mln dollar) davlatlari bilan amalga oshirilgan.
Xorijiy mamlakatlar bilan eng ko‘p oldi-sotdi Toshkent shahri tomonidan bo‘lgan. Poytaxt qariyb 1,9 mlrd dollarlik (umumiy savdoning 41,7 foizi) tovar va xizmatlarni eksport–import qilgan. Eng kam tashqi savdo ulushi Sirdaryo viloyati hissasiga to‘g‘ri kelgan — 52,1 mln dollar (1,2 foiz).
Eksport ko‘rsatkichlari
Yanvarda O‘zbekiston eksportining 37,6 foizini xizmatlar tashkil etdi. Mamlakat xorijga oy davomida 492,1 mln dollarlik xizmatlar sotgan (o‘sish 21,9 foiz). Taqqoslash uchun, 2024-yilda bu ko‘rsatkich 403,6 mln dollar edi. O‘tgan oyda xizmatlar eksporti tarkibining asosiy ulushi turizm (47,6 foiz) hamda transport (37,1 foiz) bilan bog‘liq sohalar hissasiga to‘g‘ri kelgan.
Keyingi yuqori ulushni sanoat tovarlari eksporti tashkil etgan — 265,5 mln dollar (20,2 foiz). Shu bilan birga, oziq-ovqat mahsulotlari va tirik hayvonlar eksporti ulushi nisbatan yuqori (10,9 foiz) bo‘lgan.
Garchi O‘zbekistonda tabiiy gaz taqchilligi kuzatilsa-da, mazkur mahsulot eksporti yanvarda ham to‘xtatilmagan. Oy davomida xorijga 21,8 mln dollarlik gaz sotilgan. Shuningdek, 17,5 mln dollarlik elektr toki eksport qilingan.
Xuddi 2024-yil yanvardagidek, joriy yilning ilk oyida ham oltin eksport qilinmagan. Odatda mamlakat yillik eksport tushumining uchdan bir qismi oltin sotuvidan keladi.
O‘z navbatida respublika o‘tgan oyda 6,6 mln dollarlik avtomobillar, 81,7 mln dollarlik meva-sabzavot eksport qilgan.
Import tarkibi
O‘zbekistonga yanvar oyida eng ko‘p import qilingan tovarlar mashinalar va transport asbob uskunalari bo‘lgan. Bir oy davomida mamlakatga jami 1,1 mlrd dollarlik (umumiy importning 35,3 foiz) mazkur turdagi mahsulotlar xarib qilinib, olib kelingan. O‘tgan yilning mos davrida 1,3 mlrd dollarlik mashinalar va transport asbob uskunalari sotib olingandi. Avvalroq avtomobillar importi qisqarishiga mamlakatga xorijda ishlab chiqarilgan avtomobillarni kiritishda yaratilgan sunʼiy to‘siq sabab bo‘layotgani aytilgan.
O‘tgan oyda sanoat tovarlari importi ham nisbatan yuqori ulushni (15,8 foiz) tashkil etgan. Yanvarda umumiy qiymati 504,8 mln dollarlik shunday tovarlar chet eldan xarid qilingan.
Shuningdek, xorijdan 408,6 mln dollarlik kimyoviy vositalar (12,8 foiz), 334,7 mln dollarlik oziq-ovqat va tirik hayvonlar sotib olingan.
Yanvar oyida O‘zbekistonga 144,1 mln dollarlik neft va neft mahsulotlari, 27,8 mln dollarlik gaz, 21,4 mln dollarlik elektr toki import qilingan. Shu bilan birga, jami qiymati 243,8 mln dollarlik avtomobillar xarid qilingan.
Umumiy importning eng ko‘p ulushlari — Xitoy (28,3 foiz), Rossiya (16,6 foiz), Qozog‘iston (7,5 foiz) davlatlaridan amalga oshirilgan.
Maʼlumot uchun, 2024-yilda O‘zbekiston tashqi savdo aylanmasi hajmi 65,93 mlrd dollarni tashkil etgan. Shundan eksport ulushi 26,94 mlrd dollar, import 38,98 mlrd dollar bo‘lgan. Eksport va import o‘rtasidagi taqchillik — 12 mlrd dollarga yetgan.
Izoh (0)