Ўзбекистон Бутунжаҳон сайёҳлик ташкилотининг Сайёҳларни ҳимоя қилиш халқаро кодексига расман қўшилди.
Қайд этилишича, бу билан мамлакат туризм соҳасидаги халқаро стандартларга ва саёҳатчилар ҳуқуқларини ҳимоя қилишга бўлган содиқлигини яна бир бор тасдиқлади. Ушбу қарор сўнгги йилларда барқарор ўсиш кўрсатаётган ва жаҳон миқёсида тан олинаётган мамлакат туризм соҳасини ривожлантиришда муҳим қадам бўлди.
Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов “Сайёҳларни ҳимоя қилиш халқаро кодекси COVID-19 пандемиясидан сўнг саёҳатларга бўлган ишончни қайта тиклашга қаратилган уйғунлаштирилган тизим эканини таъкидлаган. Ўзбекистон ушбу кодексга амал қилиш орқали барча сайёҳлар учун янада хавфсиз ва ишончли саёҳат муҳитини яратишни мақсад қилган.
БМТ Туризм ташкилоти томонидан ишлаб чиқилган Сайёҳларни ҳимоя қилиш халқаро кодекси сайёҳларнинг хавфсизлиги, ҳуқуқ ва манфаатларини таъминлашга, шунингдек туризмнинг барқарор ривожланишига кўмаклашишга қаратилган тамойиллар ва тавсиялар мажмуаси.
Ушбу ҳужжатга қўшилиш орқали Ўзбекистон меҳмондўстлик соҳасидаги илғор тажрибаларни жорий этишга ва чет эллик меҳмонлар учун қулай шароитлар яратишга тайёрлигини тасдиқлайди.
Ўзбекистонга 2024 йилда жами 8,2 млн нафар чет эл фуқаролари туристик мақсадларда ташриф буюрган.
Шундан:
- аёллар – 4 077,1 минг нафар (49,8 фоиз)
- эркаклар – 4 104,3 минг нафар (50,2 фоиз)
Маълумот учун, Ўзбекистонга 2023 йилнинг январь—декабрь ойларида 6,6 млн нафар чет эл фуқаролари туристик мақсадларда ташриф буюрган.
Ташрифи ошиб бораётган сайёҳлар
2024 йилнинг бошидан туристлар оқими ҳар ой салмоқли ошиб бормоқда. Европа иттифоқи давлатларидан 2024 йилнинг январь ойида 4 601 нафар фуқаро туристик мақсадда Ўзбекистонга ташриф буюрган. Январь март ойларида жами 1 млн 519,3 минг нафар чет эл фуқаролари туристик мақсадларда келган.
5 ойда эса 2,8 миллиондан ортиқ чет эл фуқаролари туристик мақсадда ташриф буюрган. Шуларнинг, 10,6 минг нафари АҚШдан келган.
6 ойга келиб эса 3,5 миллиондан ортиқ чет эл фуқаролари туристик мақсадда ташриф буюрди. 1 октябргача эса жами 5,7 млн нафар келди.
Изоҳ (0)