IT sohasida 1000 ta yangi ish o‘rni yaratiladi: 2025-yilgi Offshore Outsourcing Conference natijalari

Toshkentda Raqamli texnologiyalar vazirligi bilan hamkorlikda IT Park Uzbekistan tomonidan tashkil etilgan Offshore Outsourcing Conference 2025 bo‘lib o‘tdi. Bu anjuman O‘zbekistonning xalqaro IT-sanoatidagi jadal o‘sib borayotgan rolini ta’kidladi.

Konferensiyada 250 ta kompaniyadan 280 nafar ishtirokchi, shu jumladan 25 ta davlatdan 39 ta xalqaro tashkilot ishtirok etdi.

Yillik daromadi 500 million dollardan 5,5 milliard dollargacha bo‘lgan dunyoning to‘rtta yetakchi IT-xizmatlar va BPO kompaniyalari — “Tech Mahindra”, “Armatis, Netskope” va “SBL” ishtirokchilardaa alohida qiziqish uyg‘otdi.

Tadbir qatnashchilari O‘zbekistonning qulay biznes muhiti bilan tanishdilar. Bu muhit yuqori malakali yosh mutaxassislar va IT-kompaniyalarni qo‘llab-quvvatlovchi davlat dasturlari bilan ajralib turadi. Jahon sanoatining yetakchilari bilan aloqa o‘rnatish, yangi hamkorlik munosabatlarini shakllantirishga va xalqaro bozor imkoniyatlarini ochishga alohida e’tibor qaratildi. Anjuman doirasida O‘zbekistonni autsorsing va biznesni kengaytirish uchun istiqbolli yo‘nalish sifatida jozibadorligini oshiruvchi Enterprise Uzbekistan, Zero Risk, Softlanding va IT Visa tashabbuslari taqdim etildi.

O‘zbekiston — IT-sanoatning yangi markazi

Raqamli texnologiyalar vaziri Sherzod Shermatov O‘zbekiston o‘zining strategik joylashuvi, yuqori kadrlar salohiyati va qulay investitsiya muhiti tufayli xalqaro biznesni jalb etayotgan yetakchi IT-habga ishonch bilan aylanib borayotganini ta’kidladi.

“2017-yilda O‘zbekistonda o‘ntadan kam IT-kompaniya bor edi. O‘shanda ko‘pchilik gap qaysi davlat haqida ketayotganini tushunish uchun internetdan “O‘zbekiston nima?” deb qidirishga majbur bo‘lardi. Bugun bu savol ortiqcha. Bir necha yil ichida biz innovatsiyalarni rivojlantirish uchun xalqaro kompaniyalar, investorlar va eng yaxshi mutaxassislar birlashadigan dinamik IT-markazga aylandik. Bu Prezidentimizning raqamli iqtisodiyotda O‘zbekiston yetakchi o‘rinni egallagan kelajak haqidagi g‘oyasining ro‘yobga chiqishidir.

Bugun biz yana bir qat’iy qadam qo‘ymoqdamiz — biznes uchun yanada ko‘proq imkoniyatlar yaratish va yetakchi IT-hab sifatidagi obro‘yimizni mustahkamlashga qaratilgan “Enterprise Uzbekistan” loyihasini ishga tushirmoqdamiz,”, dedi O‘zbekiston Respublikasi raqamli texnologiyalar vaziri Sherzod Shermatov

IT Park Uzbekistan bosh direktori Abdulahad Kuchkarov ushbu fikrni qo‘llab-quvvatlab, bugungi kunda umumiy daromadi 1,6 milliard dollarni tashkil etuvchi 2600 dan ortiq kompaniyalarni birlashtirgan IT Park’ning ajoyib yutuqlarini taqdim etdi.

“2017-yilda IT Park shunchaki qog‘ozdagi loyiha edi — Farhod Ibragimovning dadil g‘oyalaridan ilhomlangan kichik startap. O‘sha paytda faqat g‘oya va intilish bor edi, ammo muvaffaqiyatga erishish uchun hech qanday kafolat yo‘q edi — faqat ishonch, mashaqqatli mehnat va imkonsiz narsani haqiqatga aylantirishga intilish mavjud edi. 

Bugun, 2025-yilda butun mamlakat bo‘ylab 14 ta filialimiz, shuningdek, xorijda 4 ta vakolatxonamiz bor. Rezident kompaniyalarimizning daromadi 1,6 milliard dollarni tashkil etadi, IT Park tarmog‘i esa 2600 dan ortiq kompaniyalarni, jumladan 700 ga yaqin xorijiy korxonalarni birlashtirmoqda. O‘zbekiston IT-autsorsing uchun eng jozibador yo‘nalishlardan biriga aylandi. Kompaniyalar nafaqat qulay shart-sharoitlar, balki iqtidorli mutaxassislar, kuchli davlat ko‘magi va yuksak ishonch tufayli ham mamlakatimizni tanlamoqda. Bu endi shunchaki IT Park tarixi emas. Bu butun mamlakat tarixi,” dedi Abdulahad Kuchkarov.

Raqobat ustunliklari: kadrlar, barqarorlik va innovatsiyalar

O‘zbekistonning moliyaviy jozibadorligi va xavfsiz biznes muhiti muhokamalarning asosiy mavzulariga aylandi. IT Park Uzbekistan bosh direktori maslahatchisi Ahmed Abulez O‘zbekiston dunyoning eng xavfsiz 10 ta mamlakati qatoriga kirishini, IT-mutaxassislar soni allaqachon 203 ming kishiga yetganini, bu esa mamlakatning kadrlar salohiyati jadal o‘sib borayotganini tasdiqlayotganini ta’kidladi.

Yevropa Ittifoqi va Buyuk Britaniya bozorlari bo‘yicha bosh menejer Fayzulla Ulmasov konferensiya ishtirokchilariga O‘zbekistondagi IT-kompaniyalar uchun mavjud bo‘lgan keng imkoniyatlarni taqdim etdi. Uning ta’kidlashicha, mamlakat yangi bozorlarda o‘z faoliyatini kengaytirishga intilayotgan IT-kompaniyalar va mutaxassislar uchun maqbul shart-sharoitlarni yaratib, biznes yuritish uchun qulay muhitni faol shakllantirmoqda.

Enterprise Uzbekistan — shaffof huquqiy standartlar, GDPR talablariga muvofiqlik va maxsus rag‘batlantirish choralari orqali IT-biznesni jalb qilishga qaratilgan yangi iqtisodiy zonaning taqdimoti muhim voqea bo‘ldi. Enterprise Uzbekistan loyiha menejeri Dilnoza Rasulova ushbu tashabbusning asosiy afzalliklari haqida batafsil ma’lumot berib, O‘zbekiston xalqaro texnologiya kompaniyalari uchun qulay shart-sharoitlar yaratishga intilishini ta’kidladi.

Soha nuqtayi nazaridan, “EPAM Uzbekistan” kadrlar bo‘limi rahbari Marina Ten EPAMning mahalliy IT-mutaxassislar salohiyatidan foydalanish tajribasi bilan o‘rtoqlashib, sohaning kadrlar imkoniyatlari jadal o‘sib borayotganini ko‘rsatdi:

“Biz beshta JAVA mutaxassisidan iborat jamoa bilan ishni boshlaganmiz, bugungi kunda esa kompaniyamizda 600 nafar dasturchi va IT-mutaxassis ishlaydi. Ularning ko‘pchiligi Buxoro va Andijon kabi shaharlardan masofaviy tarzda faoliyat yuritadi.

O‘zbekiston ulkan salohiyatga ega va biz EPAMda ushbu keng ko‘lamli o‘zgarishlarning bir qismi bo‘lishdan xursandmiz. Birgalikda biz kelajak mutaxassislari avlodini shakllantiramiz, ularga global raqamli iqtisodiyotda muvaffaqiyatli karyera qurish uchun zarur ko‘nikmalarni egallashda yordam beramiz.”

“Lavoro Tech” kompaniyasining boshqaruvchi direktori Serxio Basto ta’kidlashicha, O‘zbekiston nafaqat IT-iste’dodlarni faol rivojlantirmoqda, balki ularni jahon standartlari darajasida ushlab turish va kasbiy o‘sishi uchun sharoitlar yaratmoqda:

“Odamlarsiz hech narsa sodir bo‘lmaydi - barcha narsani ular yaratadi. Orzular, kompaniyalar, strategiyalar - barchasi inson qo‘li bilan bunyod etiladi. Kompaniyalar odamlarni emas, aksincha, odamlar kompaniyalarni barpo etadi.

IT Park bilan hamkorlikda biz nafaqat kadrlarni jalb qiladigan, balki ularni ushlab turadigan, rag‘batlantiradigan va rivojlanishiga yordam beradigan tizimni yaratdik. Biz imkonsiz narsa haqiqatga aylanadigan muhitni yaratamiz va kelajak sari intilishda davom etamiz."

Konferensiya doirasida ishtirokchilar mamlakatning yetakchi IT-kompaniyalari va ta’lim muassasalariga tashrif buyurishdi. “Dyninno Group” kompaniyasida mehmonlar Shimoliy Amerikadagi moliyaviy xizmatlar, turizm va ko‘ngilochar sanoat bozorini o‘zgartirayotgan eng so‘nggi IT-yechimlar haqida ma’lumot oldilar. Toshkent axborot texnologiyalari universitetida (TATU) delegatlarga zamonaviy tadqiqot laboratoriyalari va IT-ta’lim sohasidagi hamkorlikning mumkin bo‘lgan yo‘nalishlari taqdim etildi. “Uzinfocom” kompaniyasida konferensiya ishtirokchilari biometrik autentifikatsiya, blokcheyn va raqamli hukumat sohasidagi ilg‘or texnologiyalar bilan tanishdilar. “Uzinfocom” tomonidan taqdim etilgan asosiy yechimlardan biri “MyID Palm” tizimi — xavfsizlik darajasi va autentifikatsiya aniqligini sezilarli darajada oshiradigan kaft tasviri bo‘yicha biometrik identifikatsiyalashning innovatsion texnologiyasi bo‘ldi. Ushbu loyiha O‘zbekistonning raqamli transformatsiyasi yo‘lidagi muhim qadamdir.

Seminarlar, biznes-maslahatlar va investitsiya istiqbollari

Konferensiyaning ikkinchi kuni amaliy seminarlar va biznes-maslahatlarga bag‘ishlandi. Ishtirokchilarga O‘zbekistondagi autsorsing infratuzilmasi, tartibga solish muhiti va investitsiya rag‘batlarining batafsil tahlili taqdim etildi. IT Park mutaxassislari biznes yuritishning asosiy jihatlarini, jumladan, kompaniyalarni ro‘yxatdan o‘tkazish tartibi, soliq imtiyozlari va iste’dodlarni jalb qilish strategiyalarini batafsil ko‘rib chiqdilar.

Xalqaro kompaniyalar uchun ofis binolari va ish haqi to‘lovlarida qo‘llab-quvvatlashni taklif etuvchi “Zero Risk” dasturiga, shuningdek, O‘zbekiston IT-kompaniyalarining xalqaro bozorlarga chiqishiga ko‘maklashuvchi “Local2Global” tashabbusiga alohida e’tibor qaratildi. Bundan tashqari, ishtirokchilarga IT-mutaxassislar va investorlar uchun uch yillik ko‘p martalik vizani ta’minlovchi “IT Visa” dasturi, hamda xorijiy kompaniyalarning O‘zbekiston bozoriga kirish jarayonini soddalashtirishga qaratilgan “Softlanding” dasturi taqdim etildi.

Konferensiya yakuniga ko‘ra, 10 dan ortiq kompaniya O‘zbekistonda o‘z vakolatxonalarini ochish niyatida ekanligini ma’lum qildi.  Hozirda ular mahalliy kadrlar salohiyati va ofis binolari variantlarini baholamoqda. Ikki kompaniya — xalqaro dasturiy ta’minot ishlab chiqaruvchisi “Midas Group” (Germaniya) va IT-xizmatlarga ixtisoslashgan “TRON Enterprise Solution” (Ruminiya) tadbir davomida ofislar ochish uchun rasmiy ariza topshirdi.

Ushbu tashabbuslar natijasida kamida 1000 ta yangi ish o‘rni yaratilishi, IT-xizmatlar eksporti hajmi 10 million AQSH dollariga oshishi kutilmoqda.

Global IT-bozorda O‘zbekiston kelajagi

Konferensiya to‘g‘ridan-to‘g‘ri xorijiy investitsiyalarni jalb qilish, ish o‘rinlarini yaratish va raqamli iqtisodiyotni jadal rivojlantirish orqali O‘zbekistonga sezilarli foyda keltirishi kutilmoqda. Autsorsing sektorini kengaytirish mamlakatning texnologik salohiyatini mustahkamlash, mahalliy IT-mutaxassislarni tayyorlash darajasini oshirish va dunyoning yetakchi texnologiya kompaniyalari bilan hamkorlik qilish uchun yangi imkoniyatlar ochish imkonini beradi. O‘zbekistonning mintaqaviy IT-markaz sifatidagi mavqeini mustahkamlash barqaror iqtisodiy o‘sish va innovatsion o‘zgarishlarga hissa qo‘shadi.

Reklama huquqi asosida.