Buxoro viloyat hokimi Botir Zaripov ishtirokida matbuot anjumani tashkil etildi. Kasbiy ko‘nikmalar markazida bo‘lib o‘tgan matbuot anjumanida viloyatda faoliyat ko‘rsatayotgan ommaviy axborot vositalari xodimlari, respublika davriy nashrlari, intnrnet nashrlari, telekanallarining viloyatimizdagi muxbirlari, jurnalist va blogerlar, jamoatchilik vakillari, qolaversa, mutasaddi tashkilot va idoralar rahbarlari ishtirok etdilar.
Matbuot anjumanida so‘z olgan viloyat hokimi Botir Zaripov tadbir qatnashchilari, ommaviy axborot vositalari xodimlari, bloger va jurnalistlarni muborak Ramazon oyi, bahor ayyomi bilan samimiy muborakbod etib, o‘tgan yilda viloyatni ijtimoiy-iqtisodiy rivojlantirish, shahar va tumanlarda jumladan, qishloq xo‘jaligi, sanoat va ishlab chiqarish, qurilish, sog‘liqni saqlash, yoshlar taʼlimi, sport, investitsiya, sayyohlik sohalarida, boshqa muhandislik-kommunikatsiya tarmoqlarida amalga oshirilgan chora-tadbirlar, joylarda ishsizlikni bartaraf etish, kambag‘allikni qisqartirishda joriy yilda jadal boshlangan saʼy-harakat, ro‘yobga chiqarilayotgan loyihalar xususida atroflicha maʼlumot berdi.
Eʼtirof etilganidek, Vatanimizda amalga oshirilayotgan islohotlarning bosh maqsadi insonga, uning erkin hayoti, qadr-qimmati va farovonligiga qaratilgan bo‘lib, bu borada “O‘zbekiston – 2030” strategiyasida 100 ta muhim maqsad va yo‘nalish belgilab berilgan. Shundan kelib chiqib, viloyatda aholining turmush tarzini yaxshilash, yangi korxonalarni tashkil qilish, ishlab chiqarish, xizmat ko‘rsatish sohalarini rivojlantirish orqali aholi daromadini oshirish, turmush tarzini yaxshilashga alohida eʼtibor qaratilmoqda.
Tahlillardan ko‘rinishicha, iqtisodiyot sohasida yalpi hududiy mahsulot hajmi 2024-yil yakuni bilan 71,6 trillion so‘mga yetkazilib, bu ko‘rsatkich 2023-yilga nisbatan 106,6 foizga oshishiga erishilgan. Aholi bandligini taʼminlash dasturlari doirasida 2024-yilda jami 236 ming nafar aholining bandligi taʼminlangan.
Chunonchi, xorijga chiqib ketgan mehnat migrantlarining 608 nafari tartibli mehnat migratsiyasi bilan qamrab olingan va 3 ming 647 nafar fuqaro mutaxassislikka o‘qitilgan. Bu saʼy-harakat tufayli hududda kambag‘allik darajasini 2023-yildagi 11,8 foizdan 2024-yil yakuni bilan 7,3 foizgacha tushirishga erishilgan.
Prezident tomonidan tadbirkorlarga yaratilgan shart-sharoit va berilgan imkoniyatlarni inobatga olib, tadbirkorlik subyektlari soni Buxoro viloyatida 35,4 mingtaga yetkazilib, bu 2023-yilga nisbatan 10,6 mingtaga ko‘paygan. Tadbirkorlik faoliyatini qo‘llab-quvvatlash uchun tijorat banklari tomonidan 2024-yilda 6,5 trillion so‘m kredit mablag‘i ajratilgan. Muhimi, bugunga kelib 76 ming nafar fuqaro aynan shu korxonalarda mehnat qilishib, moddiy manfaat topishmoqda.
Masalan, yangidan ish boshlagan korxonalar qatorida Buxoro shahridagi "Buxara Nekst jenereyshn produkt" MCHJni sanab o‘tish joiz. Bu yerda qiymati 120 million AQSH dollariga teng, quvvati 2 million dona elektrotexnika va maishiy texnika vositalari (televizor, konditsioner, kir yuvish mashinasi, chang yutgich, elektrochoynak va mikroto‘lqinli pech) ishlab chiqarish loyihasini ishga tushirish hisobiga 2 mingta yangi ish o‘rni yaratilgan.
Xuddi shunday, Peshku tumanida “Buxoro Peshtex” MCHJ faoliyatini kengaytirib, subyektda qiymati 190,6 milliard so‘mlik, yiliga 5 ming tonna ip-kalava ishlab chiqarish loyihasi ishga tushirilgani mahalliy aholi vakillarining 200 nafardan ortig‘ini ish bilan bandligini taʼminlamoqda.
Yoki Olot tumanida “Arev Gurleshik” MCHJ qo‘shma korxonasi tomonidan elektr energiyasi taʼminotida transformator punktlari va quvvatlash stansiyalarini ishlab chiqarishni tashkil qilish loyihasi amaliyotga joriy qilingan. Bu tashabbus doirasida 15,1 million AQSH dollariga teng to‘g‘ridan-to‘g‘ri xorijiy investitsiya o‘zlashtirilgan.
Shuningdek, qurilish-bunyodkorlik sohasida 2024-yilda Buxoro viloyatida ijtimoiy va ishlab chiqarish infratuzilmasini rivojlantirish dasturi doirasida umumiy qiymati 991,3 milliard so‘m mablag‘ evaziga 137 ta obyektni yangidan qurish, rekonstruksiya qilish va mukammal taʼmirlash ishlari bajarilgan. Jumladan, 42 ta umumtaʼlim maktabi, 11 ta maktabgacha taʼlim, 12 ta sog‘liqni saqlash, 1 ta oliy taʼlim muassasasida, 3 ta sport inshootida mukammal taʼmirlash va qurilish ishlari olib borilgan. Ifratuzilma obyektlarini rivojlantirish maqsadida 15 ta ichimlik suv taʼminoti, 9 ta avtomobil yo‘li, 11 ta irrigatsiya, 6 ta melioratsiya inshooti, 6 ta elektr taʼminoti obyekti yangidan qurilgan.
Yana bir muhim tarmoq, o‘tgan yilda viloyatda aholining uy-joyga bo‘lgan talabini qondirish maqsadida 127 ta, jami 6010 ta xonadonli ko‘p qavatli uy-joy zamonaviy andozalar asosida qurib foydalanishga topshirilgan. Jumladan, Qorako‘l va G‘ijduvon tumanlaridagi “Yangi O‘zbekiston” massivlarida jami 360 xonadonga ega bo‘lgan 18 ta ko‘p qavatli turar joy inshooti, qolaversa, yangicha tartib va dizayn asosida viloyatimizning boshqa hududlarida 109 ta, jami 5 ming 650 xonadonli ko‘p qavatli uy-joy barpo qilinib, asosan yosh oilalarga foydalanishga topshirilgan.
Bundan tashqari, Buxoroda sayyohlik tizimini rivojlantirish, ziyorat turizmi bo‘yicha ham katta salohiyat shakllangan. O‘z navbatida, sayyohlarga zarur infratuzilmani yaratish maqsadida mehmonxonalar soni 607 taga, sayyohlarga xizmat ko‘rsatuvchi turistik korxona soni esa 186 taga yetkazilgani munosib yutuqlardan, albatta. Sohadagi islohotlar tufayli vilooyatimizda “Vindham”, “Merkuriy”, “Sahid” kabi xalqaro brendlarga xos bo‘lgan 2 ta 4 yulduzli va 4 ta 3 yulduzli mehmonxona qatorida “Hayat Rejensi”, “Hilton”, “Ramada” kabi xalqaro brendlar ish boshlash arafasida.
Yana bir muhim loyihalardan, Bahouddin Naqshband majmuasida 500-600-yil avval bunyod qilingan “Toqi Miyona” ziyorat yo‘lagi qayta tiklandi.
Buxoro viloyatida tarixiy ahamiyatga ega turizm namoyish inshooti soni esa 300 tadan oshdi. Ziyorat turizm yo‘nalishida Singapurda bo‘lib o‘tgan “Halal In Travel — Global Summit 2024” umumjahon sammitida “Halal In Travel — Global Summit2024” mukofoti Buxoroga topshirildi. 2024-yil noyabrda “Xalqaro ziyorat turizmi haftaligi” doirasida Vobkentda “Shirin” turizm qishlog‘i va G‘ijduvonda “Qo‘rg‘on” turizm mahallasi maqomini oldi. Umuman, hozirda viloyatning 9 ta tumanidagi 11 ta hududida “turizm qishlog‘i” tashkil etilishi bo‘yicha amaliy saʼy-harakat olib borilmoqda.
Amerikaning mashhur yetakchi New York Times nashri Buxoro shahrini 2025-yilda tashrif buyurishga eng munosib joylar ro‘yxatiga kiritdi. Endilikda 2025-yilda Buxoro tarixiy markazida Jahon miqyosida anʼanaga aylangan yirik Xalqaro tasviriy-sanʼat anjumani (biyennalesi)ga tayyorgarlik ishlari boshlangan.
O‘z navbatida, matbuot anjumanida hozir bo‘lgan ommaviy axborot vostalari xodimlari o‘zlarini qiziqtirgan qator savollarga viloyat hokimi hamda mutasaddilardan atroflicha javob oldilar.
Izoh (0)