“Bilib qo‘yingki, ish odamni emas, odam ishni bezaydi”. Millionlab teleekranlarda namoyish etilgan mashhur “Benzokolonka malikasi” filmida shunday jumla bor. Sun’iy intellekt, startaplar-u inflyuenserlik zamonida o‘zining sevimli mashg‘ulotini hunarmandlikda topib, odamlarga xizmat qilayotgan gulistonlik zargar Abdukarim Nabiyev ham shu qadriyatga sherik.
Sabr va ko‘p vaqt bag‘ishlashni talab etuvchi kasb
18 yoshidan boshlab professional shug‘ullanib kelayotgan Abdukarim Nabiyev bugungacha 50 dan oshiq shogirdlar chiqargan. Uning aytishicha, zargar bo‘lish boshqa kasblarga solishtirganda u darajada qiyin ish emas, ammo o‘rganish vaqtida katta sabr talab qiladi.
Bolaligidan o‘qituvchilari sabrliligi va sinchkovligini sezib, maqtagan qahramonimiz maktabda mehnat darsini yaxshi ko‘rgani, archa bezatish yoki uyda ta’mir ishlarida ko‘maklashishdan zavq olganini eslaydi.
“Hunarmandlar oilasida ulg‘ayganman. Shuning uchunmi, kattaroq sinfga o‘tganimda bo‘sh vaqtimda naqshlar chizish, turli shox-shabba yoki eski buyumlarni yig’ib, ulardan san’at asarlari yasash sevimli mashg‘ulotimga aylandi. Bu meni sohaga tayyorladi. Shuning uchun zargarlik kabi kasbni tanlab, uni egallash uchun bolalikdan, 5-6-sinflardan boshlab qo‘l mehnatiga, biror nimalar yasashga o‘rganish muhim”, deydi u.
Uning fikricha, maktabni bitirgan yoki katta yoshli odamlar tezroq natija ko‘rgisi, tezroq pul topgisi keladi.
“Zargarlik yaxshi daromad keltiradigan hunar bo‘lsa-da, sezilarli iqtisodiy foyda bir necha oy va hatto yillardan keyin kelishi mumkin”.
“Hunarmand” uyushmasiga a’zolik
2006-yilda 21 yoshli Abdukarim Nabiyev “Hunarmand” uyushmasiga a’zo bo‘ladi. Uyushmaning Sirdaryo viloyati boshqarmasi boshlig‘i Muzaffar Rahmatovning so‘zlariga ko‘ra, turli xalqaro festival va tanlovlarda muvaffaqiyatli ishtirok etishidan tashqari, Nabiyev chekka hududlardan kelgan kam ta’minlangan oila farzandlariga o’z sohasi sir-asrorlari beminnat o‘rgatib kelmoqda.
Uyushma vakili Muzaffar Rahmatov hikoyamiz qahramonining 2016-yildan buyon qatnashgan yigirmaga yaqin respublika hamda xalqaro miqyosdagi ko‘rgazma, festival va tadbirlarni sanaydi. Buxoro ipak va ziravorlar festivali, “Tashabbus” ko‘rik-tanlovlari, “Oltinqo‘l hunarmand” xalqaro ko‘rgazmasi, Toshkent xalqaro turizm ko‘rgazmasi, qovun sayllari, Navro‘z va hosil bayramlari shularning ba’zilari xolos.
“Abdukarim Nabiyev uyushmaning eng faol a’zolaridan, u o‘z ustaxonasida ham, oila va mahallada ham, hayotning boshqa jabhalarida ham energiyaga boyligi bilan havas qilishga arziydi”, qo‘shimcha qiladi u.
E’tirof
Albatta har qanday hunarmand uchun eng zo‘r e’tirof bu uning ijod mahsullari qo‘lma-qo‘l bo‘lishidir. Abdukarim Nabiyev 22 yildan beri yuzlab zeb-ziynat ixlosmandlariga xizmat qilib kelmoqda.
Uni telekanallar tonggi dasturlari va ko‘rsatuvlarga taklif qilishadi. Festival va tanlovlarda sovrinlar berishadi.
2024-yil Buxoroda bo‘lib o‘tgan II xalqaro zargarlik va zardo‘zlik festivali, shuningdek, Craft Fair yarmarkasida ishtirok etib, tadbirlar doirasida “Yilning eng yaxshi hunarmandi” mukofotiga loyiq topildi.
“Bir kishi o‘zini to‘laqonli baxtli his qilishi uchun hamma narsam bor deb o‘ylayman. Zargarlik o‘lmaydigan hunar. Hozir ham zargarlarga ish bor, ularga talab bor. Keyin ham bo‘ladi. Ko‘proq yoshlar bu hunarni bo‘lajak kasblari sifatida ko‘rib chiqishlari va tanlashlarini istardim”, deydi u.
Ehtimol, mashhur sovet filmida avval diktorlik, styuardessalik va balerina orzusi bo‘lgan bosh qahramon qizning benzokolonkani gullatib, alaloqibat texnik sohadan ketishi davr propagandasining bir qismi bo‘lgandir. Albatta, har kim sevgan kasbini egallashi lozim.
Lekin qahramonimiz “yoshlar kasb tanlayotganda jamiyat ularga standart qilib belgilab bergan dasturchilik-u yuristlik kabi “oq yoqali” ishlar barobarida o‘zlarining noyob iste’dod va qiziqishlariga mos yuzlab boshqa kasblarni ham bee’tibor qoldirmasin” deydi.
Saidaziz Aʼzamov tayyorladi
Izoh (0)