Senatorlar Samarqand viloyatining qator tuman va shaharlari chegaralarini o‘zgartirishga rozilik bildirdi, deb xabar bermoqda parlament yuqori palatasi matbuot xizmati.
22-fevraldagi yalpi majlisda parlament yuqori palatasi a’zolari tomonidan Samarqand viloyatining Samarqand shahri, Samarqand va Oqdaryo tumanlari chegaralarini o‘zgartirish to‘g‘risidagi masala qizg‘in muhokama qilindi va muhokama so‘nggida Senatning tegishli qarori qabul qilindi.
Majlisda ushbu o‘zgarishlarni amalga oshirish aholiga munosib yashash sharoitini yaratish, buning uchun tegishli manzillarda muhandislik-kommunikatsiya tizimlarini, shuningdek ijtimoiy soha (maktab, bog‘cha, kasalxona) obyektlarini barpo etish, yangi ish o‘rinlarini yaratishda muhim ahamiyatga ega ekanligi qayd etildi.
2023-yil 20-iyulda Prezidentning “Samarqand shahrida “Shirin” zamonaviy ishbilarmonlik markazi va turar joylar kompleksini barpo etish chora-tadbirlari to‘g‘risida”gi qarori qabul qilingan edi. Muhokama qilingan masala ham aynan Samarqand viloyatining o‘ziga xos xususiyatlarini inobatga olgan holda davlat rahbari tomonidan qabul qilingan qarorning to‘liq ro‘yobga chiqarilishida muhim omili sifatida xizmat qiladi.
Xususan, aholining uy-joy bilan taʼminlash bo‘yicha takliflaridan kelib chiqib, fuqarolar uchun qulay bo‘lgan Samarqand shahridan o‘tgan Zarafshon daryosi qirg‘og‘i bo‘ylab 15 kilometr uzunlikdagi masofada qiymati 10 milliard dollarlik “Shirin” zamonaviy ishbilarmonlik markazi va turar joylar kompleksini barpo etish maqsad qilingan.
Senatorlar ko‘rib chiqqan masalada Samarqand viloyati Oqdaryo tumanidan 243 gektar, Samarqand tumanidan 170 gektar, jami 413 gektar yer maydoni Samarqand shahri tarkibiga o‘tkazilishi nazarda tutilmoqda. Natijada amaldagi 252 gektardan iborat “Shirin” mavzesi hududi kengaytirilib, jami 665 gektar maydonni tashkil etadi.
Muhokamalar jarayonida tasdiqlangan master reja bo‘yicha hududda 180 ming aholiga mo‘ljallangan jami 60 mingta xonadondan iborat 254 ta ko‘p qavatli uylar, 45 ta ijtimoiy soha obyekti qurilishi maʼlum qilindi. Mazkur “Shirin” shaharchasida bunyodkorlik loyihalarini amalga oshirish muddatlari aniq rejalashtirilgan va qurilish ishlari 3 ta bosqichda olib boriladi. “Shirin” zamonaviy ishbilarmonlik markazi to‘liq barpo etilishi natijasida turli sohalarda 50 mingga yaqin aholi uchun yangi ish o‘rinlari yaratiladi.
Bundan tashqari, hududda 112 kilometr ichki yo‘llar, piyodalar va velosiped yo‘laklari, 6 kilometr yerusti metro yo‘li, 2 ta katta ko‘prik hamda 7,2 kilometr ichki kommunikatsiya uchun tunnel, 180 kilometr irrigatsiya quvuri hamda 14 kilometr kanal va ko‘plab sug‘orish inshootlari qurilishi rejalashtirilgan.
Senatorlarning fikriga ko‘ra, viloyatdagi chegaralarning o‘zgartirilishi Samarqand shahrining meʼmoriy qiyofasini yaxshilash va obodonlashtirish, xorijiy va mahalliy investorlar uchun jozibadorligini oshirish, shaharning turizm salohiyatidan samarali foydalanish, zamonaviy biznes, moliyaviy va turistik infratuzilmalarni jadal rivojlantirishni taʼminlash va eng asosiysi aholining turmush farovonligini oshirishga xizmat qiladi.
Izoh (0)