Toshkent viloyatining Parkent tumanidan poytaxt Toshkent shahriga qadar temiryo‘l barpo etilmoqda. Elektrlashtirilgan temiryo‘l uzunligi 23,8 kilometr uzunlikda bo‘ladi. Bu haqda Toshkent viloyati hokimi Zoir Mirzayev o‘zining Telegram kanalida maʼlum qildi.
Parkent tumanini poytaxt bilan bog‘lovchi Baytqo‘rg‘on—Parkent elektrlashtirilgan temiryo‘l qurilishi jadal olib borilmoqda. Bu yo‘lning umumiy uzunligi 23,8 kilometrdan iborat. Loyiha doirasida 2 ta ajratish punkti, 4 ta ko‘prik, 2 ta yo‘l o‘tkazgich, 1 ta tunnel turidagi yo‘l o‘tkazgich, 78 ta suv o‘tkazish inshooti, 7 ta avtomobil yo‘li va temiryo‘li kesishmasi qurilishi rejalashtirilgan, deydi viloyat hokimi bu haqda maʼlum qilar ekan.
Hokimning maʼlumot berishicha, u Parkent tumani aholisi bilan ochiq muloqot qilgan.
-2s7Z1oio.jpg)
Gap shundaki, Parkent markazi shu kunlarda keng ko‘lamli qurilish frontiga aylangan. Jumladan, Parkentsoy bo‘yida yangi, keng va shinam avtoyo‘l, ko‘p qavatli uy-joylar, ijtimoiy soha, savdo va xizmat ko‘rsatish obyektlarining qurilish jarayoni boshlangan. Shuningdek, tuman markazidagi ko‘prik rekonstruksiya qilinyapti, yoz oylarida transport oqimi ko‘payadigan asosiy yo‘lni tunnel orqali Zarkent va So‘qoq yo‘liga ulash ishlari ketyapti, deydi u.
Zoir Mirzayev tumanda amalga oshirilayotgan ishlar viloyatning turizm sohasi rivojlanib, sayyohlar oqimi ko‘payishiga olib kelishini yozmoqda.
Parkentda turizm infrastrukturasi tubdan qayta ko‘rib chiqilmoqda, xizmatlar sohasi rivojlanishi uchun qulay shart-sharoit hozirlanmoqda. Ayniqsa, Parkentsoy bo‘yida qurilayotgan 97 ta ko‘p qavatli uy-joy, uning pastki qavatlarida tashkil etiladigan gastronomik obyektlar, xizmat ko‘rsatish va savdo shoxobchalari hududning iqtisodiy jozibadorligini yanada oshiradi, sayyohlar oqimini ko‘paytiradi. Asosiysi, qurilish maydonining fuqarolar foydalanuvida bo‘lgan qismida amaldagi qonunchilikka binoan, o‘zaro kelishuv va xolis, adolatli baholashdan keyin ishlar boshlanadi. Hech kimning norozi bo‘lishiga yo‘l qo‘yilmaydi, deydi viloyat rahbari.
Izoh (0)