Bugun, 10-mart kuni Fransiyaning Parij shahrida O‘zbekiston turizm forumi tashkil etildi. “Daryo” fotomuxbiri Madina Nurman tadbirda bo‘lib, jarayondan suratlar oldi.
Tadbir Turizm qo‘mitasi, O‘zbekistonning Fransiyadagi elchixonasi hamda Fransiyaning turizm tashkilotlari hamkorligida uyushtirildi.
Forum doirasida “O‘zbekiston – Ipak yo‘lining durdonasi” mavzusida mamlakat turizm salohiyatiga doir taqdimot o‘tkazildi.
Tadbir ochilish marosimi O‘zbekiston haqidagi videorolik namoyishi bilan boshlandi. Rolikda mamlakat tabiati, madaniyati va anʼanalari aks etgan bo‘lib, tasvirlar ishtirokchilarda katta qiziqish uyg‘otdi.
Marosimda Turizm qo‘mitasi raisi Umid Shadiyev so‘zga chiqib, O‘zbekistonning sayyohlik borasida erishayotgan yutuqlari, respublikada sayyohlarga qulay sharoit yaratish yo‘lidagi yangiliklarni aytdi.
Tadbirda “Uzbekistan Airways” aviakompaniyasining turizmni rivojlantirishdagi o‘rni va sayyohlarga yuqori sifatli xizmat ko‘rsatish imkoniyatlari ham namoyish etildi.
Tadbirning asosiy maqsadi – O‘zbekiston va Fransiya o‘rtasidagi turizm hamkorligini mustahkamlash va mamlakatni xorijiy sayyohlar uchun jozibador yo‘nalishga aylantirishdan iborat.
Izoh (0)