Avvalroq Pokiston bosh vaziri Shahboz Sharif 25-fevral kuni rasmiy tashrif bilan O‘zbekistonga kelgani haqida xabar berilgandi. Shahboz Sharif Abdulla Aripov hamrohligida “Yangi O‘zbekiston” bog‘ida bo‘ldi va Mustaqillik monumenti poyiga gul qo‘ydi.
Mehmonga majmuaning meʼmoriy yechimlari hamda kompozitsiyasining mazmun-mohiyati va xususiyatlari haqida atroflicha maʼlumot berildi. Majmua Pokiston delegatsiyasida chuqur taassurot qoldirdi.
Maʼlumot uchun, O‘zbekistonga tashrif buyurayotgan martabali mehmonlarning prezident Shavkat Mirziyoyev tashabbusi bilan barpo etilgan mazkur muhtasham majmua bilan tanishuvi anʼanaga aylangan.
Tashrifdan maqsad nima?
Shahboz Sharif prezident Shavkat Mirziyoyevning taklifiga binoan tashrif buyurdi. Bo‘lajak oliy darajadagi muzokaralar kun tartibidan O‘zbekiston—Pokiston strategik sheriklik va ko‘p qirrali hamkorlik munosabatlarini yanada rivojlantirish va kengaytirish masalalari o‘rin olgan.
O‘zaro tovar ayirboshlash hajmini oshirish, transport bog‘liqligini kuchaytirish va tranzit salohiyatini ro‘yobga chiqarish, yengil va charm sanoati, qishloq xo‘jaligi, farmatsevtika, elektrotexnika va iqtisodiyotning boshqa tarmoqlarida kooperatsiya loyihalarini ilgari surish borasidagi qo‘shma rejalar diqqat markazida bo‘ladi. Madaniy-gumanitar va turizm aloqalarini faollashtirish masalalari ham ko‘rib chiqiladi. Xalqaro va mintaqaviy ahamiyatga molik dolzarb masalalar yuzasidan fikr almashiladi.
Sammit yakunida qo‘shma deklaratsiya va qator ikki tomonlama hujjatlar qabul qilinishi rejalashtirilgan.
Tashrifning ishbilarmonlik dasturi doirasida yetakchilar O‘zbekiston—Pokiston qo‘shma biznes forumida ham ishtirok etadi.
O‘zbekiston—Pokiston munosabatlari
Pokiston – O‘zbekiston mustaqilligini birinchilardan bo‘lib, 1991-yilning 20-dekabrida tan olgan. O‘zaro diplomatik munosabatlar esa 1992-yil 10-maydan boshlab o‘rnatilgan. Ikki davlat o‘rtasidagi iqtisodiy aloqalar keyingi yillarda yangi bosqichga ko‘tarildi. 2019-yildagi 122 mln dollarlik savdo aylanmasi 2023-yilga kelib 387 mln dollarga yetdi.
Statistika agentligi maʼlumotlariga ko‘ra, 2024-yilda O‘zbekiston Pokistonga 124,7 ming tonna meva-sabzavot mahsulotlari eksport qilgan. Bu mahsulotlarning umumiy qiymati 192,3 mln dollarni tashkil etdi. Shu bilan birga, Pokiston 2024-yilning O‘zbekiston eksport bozoridagi eng muhim sheriklardan biriga aylanib, savdo hajmi 300 million dollarga yetdi.
Izoh (0)