Ijtimoiy tarmoqlarda “Samarqandda o‘quvchining onasi maktabga kelib janjal qildi” sarlavhasi ostida videolar tarqaldi. Holat yuzasidan viloyat Maktabgacha va maktab ta’limi boshqarmasi ma’lumot berdi.
Unga ko‘ra, Samarqand viloyati Jomboy tumanidagi 44-umumta’lim maktabida 2025-yil 22-fevral kuni 8-sinf o‘quvchisi tarbiyasi bo‘yicha o‘quvchining ota-onasi, sinf rahbari tomonidan chaqirtirilgan.
Onasi farzandining xulq-atvori va tarbiyasiga e’tiborli bo‘lish haqida aytilganda, o‘qituvchilarga nisbatan qo‘pol harakatda bo‘lgan va haqoratlagan. Shu vaqtning o‘zida tuman IIB, milliy gvardiya xodimlari chaqirtirilgan va holat sudga oshirilgan. Sud jarayoni davom etmoqda.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
O‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Izoh (0)