Tarmoqlarda Qashqadaryo viloyatining Chiroqchi tumanida o‘quvchining o‘qituvchisiga qo‘l ko‘targani aks etgan video tarqalgandi. Bolalar ombudsmani holatni o‘rganib, o‘qituvchi va o‘quvchining ota-onasiga chora ko‘rilganini maʼlum qildi. Qashqadaryo viloyati maktabgacha va maktab taʼlimi boshqarmasi boshlig‘i Ubaydulla Oripov o‘qituvchiga chora ko‘rilganini rad etdi.
Bu haqda “Daryo”ga xabar bergan Ubaydulla Oripov voqeadan so‘ng o‘qituvchiga chora ko‘rilgani bilan bog‘liq axborot xato ekanini, ammo o‘quvchining ota-onasiga jarima qo‘llanganini tasdiqladi.
Ular o‘zaro kelishib, yarashib olishdi. Bundan keyin holat takrorlanmasligi uchun tushuntirish ishlari olib borildi, deydi masʼul.
Bolalar ombudsmani axborot xizmati masʼuli Dilnoza Yusupova ularga o‘qituvchiga ham chora ko‘rilgani haqida axborot berilganini, biroq o‘zlari buni hozircha aniqlashtirishga ulgurmaganini bildirdi.
Aniqlashtirib, bu haqda sizga maʼlum qilamiz, deb yozadi Dilnoza Yusupova “Daryo” jurnalistining bu haqdagi savoliga javob berar ekan.
Maʼlum qilinishicha, 8-fevral kuni 8-sinf o‘quvchilari B.N. va E.S. ingliz tili fani darsi vaqtida o‘zaro tortishib turli so‘zlar bilan bir-birini haqorat qilgan. O‘qituvchi E.F. o‘quvchiga darsdan chiqib ketishini aytgan, biroq o‘quvchi o‘qituvchining talabiga bo‘ysunmasdan unga nisbatan noo‘rin so‘zlar ishlatgan.
Maktab tartib-qoidalarini buzgan o‘quvchilarning ota-onalariga nisbatan Maʼmuriy javobgarlik to‘g‘risidagi kodeksning 47-moddasiga (bolalarni tarbiyalash va ularga taʼlim berish borasidagi majburiyatlarni bajarmaslik) ko‘ra maʼmuriy bayonnoma rasmiylashtirildi. Ushbu moddada BHMning 1 baravaridan 5 baravarigacha (375 ming so‘mdan 1 million 875 ming so‘mgacha) miqdorda jarima belgilangan.
Avvalroq Sirdaryo viloyatidagi maktabda ayol dars vaqtida sinfga bostirib kirib, o‘qituvchini urgandi. Holat bo‘yicha maʼmuriy ish qo‘zg‘atilib, Jinoyat ishlari bo‘yicha Sirdaryo tuman sudida ko‘rib chiqildi va ayol ruhiy kasalliklar shifoxonasiga joylashtirildi. Ayolning o‘zi qilmishi uchun uzr so‘rab chiqdi.
Shundan so‘ng maktabgacha va maktab taʼlimi vaziri Hilola Umarova munosabat bilan chiqib, kabi zo‘ravonlik holatlari yuz berganda o‘qituvchi-pedagoglarni himoya qilish uchun kerakli yuridik, ijtimoiy, psixologik yordam berilishini bildirdi.
“Shuni tushunib olishimiz kerakki, maktabga duch kelgan odam (dars vaqtida hatto ota-ona ham) istaganicha kirib-chiqish, dars jarayoni va pedagoglar faoliyatiga aralashish, o‘qituvchiga do‘q qilish uyoqda tursin, madaniyat chegarasidan chetga chiqib gaplashishga haqli emas”, dedi vazir.
Hilola Umarova o‘qituvchilar, pedagoglar qadr-qimmatingizni himoya qilish uchun barcha imkoniyatlarni ishga solishga tayyorligini taʼkidladi.
“Pedagogning maqomi to‘g‘risida”gi qonunning 3-moddasida pedagogning huquqlari, shaʼni, qadr-qimmati va ishchanlik obro‘si davlat himoyasi ostida bo‘lishi belgilab qo‘yilgan.
Maktabda o‘qituvchilarning kaltaklanishi
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi.
Izoh (0)