Andijon viloyati Oltinko‘l tumanidagi maktabda o‘qituvchi bo‘lib ishlovchi ayol eri tomonidan pichoqlab o‘ldirilgani haqida xabarlar tarqaldi. Viloyat prokuraturasi holat yuzasidan ma’lumotlarni ochiqladi.
Keltirilishicha, 5-fevral kuni fuqaro S.M. (erkak) sha’riy nikohidagi turmush o‘rtog‘i J.M. (ayol) bilan o‘zaro janjal oqibatida erkak xo‘jalik pichog‘i bilan ayolni qasddan o‘ldirgan.
Mazkur holat yuzasidan Oltinko‘l tumani prokuraturasi tomonidan erkakga nisbatan Jinoyat kodeksining 97-moddasi 1-qismi bilan jinoyat ishi qo‘zg‘atilgan va u protsessual tartibda ushlanib, qamoqqa olish ehtiyot chorasi qo‘llanilgan.
Qayd etilishicha, jinoyat ishi bo‘yicha olib borilayotgan tergov harakatlari alohida nazoratga olingan. Tergov davomida ishga oid barcha holatlar tekshirilib, qonuniy qaror qabul qilinishi ta’minlanadi.
Oiladagi zo‘ravonlik masalasi
O‘zbekistonda nikohdan ajratish to‘g‘risidagi ishlar ko‘rib chiqilayotganda zo‘ravonlikdan jabrlangan shaxsning talabiga ko‘ra yarashish uchun muhlat tayinlamasligi belgilanishi kutilmoqda. Nikohdan ajratish masalasi o‘z vaqtida hal qilinmasligi ayrim hollarda ayollarning o‘z joniga qasd qilishi, bevaqt o‘limi kabi ayanchli oqibatlarni keltirib chiqarmoqda.
Bu normaning amaliyotga joriy etilishi muntazam tazyiq va zo‘ravonlik holatlari bo‘lgan nizoli oilalarda og‘ir jinoyatlar sodir bo‘lishining oldini oladi. Ushbu qonunning qabul qilinishi xotin-qizlar huquqlarini yanada mustahkamlashga, ularning turar joy masalalarini qonuniy hal qilishga xizmat qiladi.
O‘zbekistonda ham har uchinchi ayol turmush o‘rtog‘i tomonidan o‘ziga nisbatan zo‘ravonlik sodir etilgan deb biladi.
Shavkat Mirziyoyev 2024-yilning may oyida ijtimoiy xizmatlar tizimini yanada takomillashtirishga oid takliflar taqdimoti bilan tanishganda har bir ayol uchun munosib turmush va mehnat sharoitlari yaratish bo‘yicha qo‘shimcha ko‘rsatmalar bergandi. 2024-yil 1-iyundan tazyiq va zo‘ravonlikdan jabrlangan yoki jabrlanish xavfi ostida bo‘lgan xotin-qizlarga himoya orderi talab etmagan holda ijtimoiy, psixologik va yuridik xizmatlar ko‘rsatish tartibi joriy etildi.
Izoh (0)