Bir tomondan qaraganda, Ritik Roshanda hamma narsa yetarli. U kelishgan qomat va ajoyib raqs qobiliyati bilan tug‘ilgan. Uning otasi Ritikni bir kechada yulduzga aylantirgan debyut filmga prodyuserlik qilgan. U yoshlikdagi muhabbatiga uylangan va ikki nafar ajoyib o‘g‘ilning otasi bo‘ldi. Hammasi oddiy, ajoyib va mukammal.
Ammo boshqa tomondan qaralsa, bu narsalar uning boshiga tushgan kulfatlarni muvozanatga keltiradi. Deformatsiyaga uchragan qo‘lni yashirish uchun ajoyib chiroyli yuz, haliyam qiynayotgan nutqidagi nuqsonini berkitish uchun kelishgan qomat, muvaffaqiyatsiz nikohining o‘rniga ikki ajoyib o‘g‘il. Aktyor bir kechada muvaffaqiyatga erishgan bo‘lsa-da, ketma-ket kelayotgan fojialar bilan kurashishga o‘zida kuch topishga majbur.
Ritik kinochilar oilasidan chiqqan. Ammo u yengil-yelpi va dabdabali hayot kechirgan oiladan emas, balki hamma narsaga o‘z kuchi bilan erishgan oiladan edi. Uning bobosi Roshan kinodagi dastlabki hind musiqachilaridan biri bo‘lgan. U Panjobdan kelib “All India” radiosida oddiy musiqachi sifatida ishlashdan to Bollivudda karyera qurishgacha bo‘lgan yo‘lni bosib o‘tgan. U musiqa chalgan, qo‘shiq va partituralar yaratgan, ammo o‘sha davr mezonlariga ko‘ra juda kam pul topgan. 50 yoshida vafot etganda ikki o‘g‘lining kattasi endigina 18 yoshga to‘lgandi.
Rakesh Roshan oilaning katta farzandi edi. Oilasiga pul kerak bo‘lgani uchun o‘qishni tashlab, otasining kino sanoatidagi tanishlaridan ish so‘raydi. U rejissyor yordamchisi sifatida ish boshlab, 3 yildan so‘ng epizodik rol o‘ynaydi.
Rakeshga doim ikkinchi darajali rollar berilardi. Bugun bunday rollar shuhrat keltirishi mumkindir, ammo o‘sha paytda ikkinchi darajali rollardan oladigan gonorari katta oilasini zo‘rg‘a ta’minlardi. 1974-yilda Rakeshning 19 yoshli ukasi Rajesh kinolar uchun qo‘shiq yozib, oilaga o‘z hissasini qo‘sha boshlaydi. Rajesh otasining musiqiy iste’dodini meros qilib olgan, akasi ham uni qo‘ldan kelgancha qo‘llab-quvvatlardi.
Rajesh 70-80-yillarda Bollivudning mashhur bastakorlaridan biriga aylanadi. Bugungi kunda bu albomlar va konsert dasturlari uchun shartnomalarni anglatsa, u paytda kam haq evaziga diqqinafas studiyalarda uzoq vaqt ishlash degani edi.
Rakesh o‘z davrasiga mansub Pinka ismli qiz bilan tanishadi. Uning otasi prodyuser va rejissyor J. Om Prakash edi. Rakesh J. Om Prakash qo‘lida ishlardi, uning oilasi Roshanning yetim qolgan oilasiga qaraganda ancha yaxshi hayot kechirardi, ammo oila kibrli va maqtanchoq emasdi.
1972-yilda J. Om Prakash filmida rol o‘ynagan Rakesh ko‘p o‘tmay uning qizi Pinkaga uylanadi. Ularning to‘ng‘ich farzandi Sunayna o‘sha yili tug‘iladi. Ritik esa 1974-yilda — Rakesh 25 yoshda bo‘lganida tug‘ilgan. Ritik “yulduz bola” qilib tarbiyalanmagan, hamma narsaga qurbi yetmagan. Ammo otasi, bobosi va amakisi oilasi hech narsaga muhtoj bo‘lmasligi uchun ko‘p mehnat qilishgan.
Ritik yaxshi maktabda o‘qiydi, oilaviy biznesda ishlay boshlaydi. Bolaligida u astronavt bo‘lishni orzu qilgan. Uni koinot, oy, yulduz va sayyoralar qiziqtirardi. U ko‘pincha onasi bilan planetariy yoki hayvonot bog‘ida vaqt o‘tkazardi, chunki hayvonlarni yaxshi ko‘rardi.
U birinchi marta 5 yoshida kinoda rol o‘ynaydi. U “Xonanda Asha” filmining suratga olish maydonchasiga bobosini ko‘rgani kelganda raqsga tusha boshlagan va bobosi Ritikka sezdirmasdan suratga oldirgan. Keyinchalik Om Prakash ushbu 8 soniyalik raqsni yakuniy filmga kiritadi. Bu kichkina Ritikning kinodagi debyuti edi.
1980-yilda u “Sendan qolgan xotira” filmida qahramonning bolaligini o‘ynaydi, ammo film titrida uning nomi ko‘rsatilmaydi. 13 yoshida Ritik allaqachon rejissyor yordamchisi bo‘lib ishlar, ta’tillarini suratga olish maydonchasida o‘tkazardi.
16 yoshida u aktyor bo‘lishni xohlayotganini aniq bilgan. Lekin ota-onasi bunga unchalik ishonmasdi, chunki Ritikka skolioz tashxisi qo‘yilgan, shuning uchun har bir harakati unga noqulaylik tug‘dirgan. Bundan tashqari, aktyorlik kasbi xavfli va kelajagi noma’lum hisoblangan.
Ritikning onasi uning oliy ma’lumotli bo‘lishini istardi. U onasining ko‘ngli uchun yaxshi kollejga o‘qishga kiradi, lekin keyinchalik yulduz bo‘lish haqida jiddiy o‘ylay boshlaydi. U otasining tashqi qiyofasiga va Roshanlar oilasining qo‘shiq yozishdagi emas, balki raqs tushishdagi musiqiy qobiliyatiga ega edi. Va u tom ma’noda suratga olish maydonchasida katta bo‘lgandi. Unda yulduz bo‘lish uchun hamma narsa bor edi.
O‘smirlik chog‘ida Ritik ozg‘in va beso‘naqay, haddan tashqari novcha edi. U bolaligidan duduqlanardi. U iste’dodli edi, ammo kinoga tayyor emasdi. Shuning uchun 2 yil sport bilan shug‘ullanadi va beso‘naqay gavdasini alp qomatga aylantiradi, burro-burro gapirishni o‘rganadi. Umuman olganda, o‘zini yulduzga aylantiradi.
Shu bilan birga, uning otasi u yoqdan-bu yoqqa yugurib, o‘g‘li bosh rolni o‘ynaydigan film uchun mablag‘ izlab, tayyorgarlik ko‘rardi. Rakeshning o‘zi rejissyorlik kursisiga o‘tiradi, akasi esa musiqa chaladi.
Bu vaqt ichida Ritikni sevgilisi Syuzanna Xon ham qo‘llab-quvvatlaydi. Syuzanna undan badavlatroq oilaning farzandi edi. Uning amakisi Feroz Xon — 80-yillar yulduzi va barcha davrlarning bir nechta xitlari prodyuseri bo‘lgan. Otasi Sanjay Xon ham aktyor va prodyuser, ammo unchalik mashhur emasdi.
U o‘zining ishqiy romani va 1980-yillarda aktrisa Zinat Amanni kaltaklagani bilan tanilgandi. 2000-yillarning boshlarida Syuzanning amakivachchasi Fardin (juda istiqbolli yosh aktyor) giyohvand moddalar uchun hibsga olinganda yana bir janjal chiqadi.
Syuzannaning ildizlari biroz g‘ayrioddiy. Otasining bobosi afg‘on, buvisi esa eronlik edi. Ular musulmon bo‘lib, etnik jihatdan Hindistonga mansub emas edilar. Ritik Syuzannani birinchi marta svetoforda to‘xtaganida ko‘rib, sevib qolganini aytadi.
U mototsiklda, qiz esa mashinada edi. Uni bir ko‘rishda sevib qoladi. Keyinroq qizni ziyofatda ko‘rib, do‘st bo‘lishni taklif qiladi. Ritik panjoblik hind, Syuzanna esa afg‘on va eronlik musulmon edi. Ammo bu ahamiyatga ega emasdi, chunki ikkalasi ham kinochilar oilasining farzandlari edi.
Ritik va Syuzanna uch yil davomida uning kinodagi debyutiga tayyorgarlik ko‘rishadi va nihoyat filmi chiqqandan so‘ng turmush qurishadi. “Sevishingni ayt!” filmi hitga aylanadi — barcha rekordlarni yangilaydi.
Bollivud hech qachon birinchi filmdayoq bunday yutuqqa erishgan aktyorni ko‘rmagan edi. Ritik bir kun emas, bir kun sevgilisiga uylanishni orzu qilgan kinochilar oilasidan chiqqan yigit bo‘lib uxlab, butun bir millatni o‘ziga rom qilgan mashhur aktyor bo‘lib uyg‘onadi.
Ritik 2000-yil dekabrda “Sevishingni ayt!” filmi premyerasidan 11 oy o‘tgach, Syuzanna Xonga uylanadi. Ular sevgi tarixlarini ommaga oshkor qilishga qaror qilishadi. Ikkalasi ham mashhur bo‘lmagan oilalarda o‘sgan, ammo Ritik o‘z shon-shuhratini sevimli ayoli bilan baham ko‘rishni xohlardi. Syuzanna Bollivudning birinchi mashhur yulduz ayollaridan biri bo‘lib, u deyarli hamma joyda eri bilan qo‘ltiqlashib yurardi.
Ritik 3 yil ichida u yengil melodramalardan tortib jiddiy dramalargacha 10 ta filmda rol o‘ynaydi. Ularning hech biri debyuti darajasida xit bo‘lmaydi. Lekin Ritik katta mag‘lubiyatga uchramaydi. U bir joyda depsinib turganga o‘xshardi.
Keyinchalik “Biz yolg‘iz emasmiz” filmida Ritik yana otasi bilan ishlaydi. Filmning konsepsiyasi g‘alati edi: o‘zga sayyoraliklar, g‘ayritabiiy qobiliyatlar va muhabbatga muhtoj bo‘lgan nozik bola. Bu film ham juda katta hitga aylanadi. 29 yoshida Ritik yana cho‘qqiga chiqadi.
Keyingi 2004-yilda u faqat bitta filmda, jiddiy rol bilan jiddiy dramada va karyerasidagi eng murakkab va qiziqarli raqs sahnalaridan biri bo‘lgan “Hayot maqsadi”da rol o‘ynaydi. Film omadsizlikka uchraydi, ammo u hind superqahramonlari haqidagi filmida otasi bilan ishlashda yana tavakkal qiladi.
Bu 2006-yilda Marvel filmlari Hindistonni qamrab olib, superqahramonlar tomoshabinlarga yoqishi mumkinligini isbotlashidan oldin edi. “Krish” hech qachon “Buyuk film” deb hisoblanmagan. Suratga olish sifati ham “Biz yolg‘iz emasmiz”ga qaraganda yomonroq edi, ammo “Krish” Ritikni yanada mashhur qilib, bolalarning sevimli qahramoniga aylantiradi.
2006-yilda uning birinchi farzandi Rexan tug‘iladi. Bola tug‘ilishi har doim odamda shaxsiy qayta baholashni keltirib chiqaradi. Ehtimol, shuning uchun Ritik unga muvaffaqiyat keltirgan blokbasterlardan yuz o‘girib, boshqa obrazlarni izlashga qaror qiladi.
Uning navbatdagi filmi 2 yil davomida o‘zini butunlay bag‘ishlagan murakkab tarixiy drama “Jodxa va Akbar” filmi bo‘ldi. U o‘z faoliyati davomida tanqidchilarning eng hayajonli baholarini oldi. O‘sha yili uning ikkinchi o‘g‘li Ridan tug‘iladi. Ritik shaxsiy hayotida ham, karyerasida ham muvaffaqiyatga erishgandi.
Biroq oradan bor-yo‘g‘i ikki yil o‘tgach, hammasi barbod bo‘la boshlaydi. “Varraklar” loyihasi Ritikni xalqaro yulduzga aylantirish umidida suratga olingandi. U bilan birga rol o‘ynagan meksikalik aktrisa Barbara Mori Ritikning Janubiy Amerikaga borishiga yordam berish umidida rolga tasdiqlanadi.
Lekin bunday bo‘lmaydi. “Varraklar” prokatda muvaffaqiyatsizlikka uchraydi, uning shaxsiy hayoti esa to‘satdan janjal va fojialarga to‘lib ketadi. Karyerasining boshidayoq OAVda Ritik bilan Karina Kapur o‘rtasida ishqiy munosabat borligi haqida mish-mishlar tarqalgandi. Lekin o‘shanda bu faqat mish-mish edi xolos.
“Varraklar” chiqqanidan so‘ng, jurnalistlar Ritik partnyori Barbara Mori bilan yashayapti deb jiddiy ravishda yozishni boshlaydi. Aytishlaricha, ularning atrofidagi odamlar yangiliklarni matbuotga quvonch bilan tarqatishgan.
Bu esa Ritik va Syuzanna munosabatlariga ta’sir qiladi. 2010-yildan keyin matbuot vaqti-vaqti bilan Syuzanna bolalari bilan goh ota-onasinikiga ketib qoladi, goh qaytib keladi, deb yoza boshlaydi. Ayni paytda Syuzanna yana ishlay boshlaydi.
U diplomli interyer dizayneri bo‘lib, onasi bilan ko‘p yillar ishlagan, ammo 2011-yilda Gauri Xon bilan birgalikda biznes boshlagan. Syuzannani Ritiksiz tomoshabinlar orasida tez-tez ko‘rishardi va muxlislarga er-xotin alohida yashayotgandek tuyulardi.
2013-yilda Ritikning “Krish 3” filmidagi hamkasbi Kangana Raunaut bilan jiddiy munosabatlari borligi haqida g‘alati mish-mishlar tarqaladi. Kangana o‘zini juda progressiv, feminist sifatida ko‘rsatadi.
Umuman olganda, Ritik va Kangananing romani haqidagi mish-mishlar tez orada Ritik va Syuzanning ajralishi haqidagi kutilmagan hayratlanarli bayonot bilan yakunlanadi. Aktyor xotinini hali ham sevishini, lekin ularning nikohi tugaganligini aytadi. 2014-yilda ular rasman ajrashishadi, ammo bir-biri bilan yaxshi munosabatda qolishadi.
Ritik bilan Syuzanna nima sababdan ajrashganini hech kim bilmaydi, lekin bu jarayon uzoq davom etgan ko‘rinadi. 2012-yilda Ritik “Olovli yo‘l” filmi bilan bog‘liq intervyular bergan. Kadrda uning og‘ir emotsional kechinmalari sezilib turardi. Uning aytishicha, bu suratga olish paytida olgan jarohati tufayli bo‘lib, uni bir necha haftaga to‘shakka mixlab qo‘ygan va depressiyaga olib kelgan, ammo bu kattaroq narsaga o‘xshardi.
Qomati har doim Ritik shon-shuhratining asosiy manbayi bo‘lgan. U sportchi edi, superqahramon rolini o‘ynardi. Raqslari uni boshqalardan ajratib turardi. Endi esa u keksayib qolgan, tanasi ham avvalgidek emas. 2014-yildan beri uning raqsli sahnalari bo‘lmadi. U Syuzannani, tanasini va oilasini yo‘qotdi.
2021-yilda u yana sevib qoldi. Ma’lum qilinishicha, hammasi Ritik layk qo‘yib, Twitter’da Sabo Azad bilan video ulashganidan boshlangan. Aktrisa Ritikka minnatdorlik bildirib, javob beradi va ular suhbatlasha boshlashadi.
Dastlab ular munosabatlarini yashiradi, ammo 48 yoshini nishonlagan kechada aktyor Sabo bilan birgalikda munosabatlarini tasdiqladi.
Aytishlaricha, Ritik Roshan — birgalikda yashash oson bo‘lgan erkaklardan emas. To‘g‘risini aytganda, birorta ham superyulduz bilan yashash oson emas. Ammo muxlislari hozirda u chinakamiga baxtli ekanidan umidvor.
Izoh (0)