Yangi yil kirib kelishidan avval ko‘plab insonlar oila davrasida bayramona kayfiyat ulashuvchi filmlarni tomosha qilishga odatlanib qolgan. Quyida 2024-yilda suratga olingan qishki asosiy bayram ruhidagi yangi filmlarni havola etamiz.
“O‘sha Rojdestvo” (rejissyor Saymon Otto)
Netflix Yangi yil arafasida boshqa striming xizmatlariga qaraganda aynan animatsion filmlar bo‘yicha faolroq ishlamoqda. Onlayn kinoteatr har yili o‘z obunachilariga oktyabr oyidan boshlab o‘nlab Yangi yil haqidagi melodramalar, oilaviy komediyalar va multfilmlarni taqdim etdi. 2024-yil oxirida rejissyor Saymon Otto va ssenariy muallifi Richard Kertis “O‘sha Rojdestvo” filmini ekranlarga namoyosh qildi.
Filmdagi voqealar Yangi Zelandiyaning Vellington shahrida bo‘lib o‘tadi. Rojdestvo arafasida kuchli qor bo‘roni keladi va mahalliy aholining aksariyat qismi bir-biridan uzilib qoladi. Tabiiy ofat aholi bayram arafasi kunini yolg‘izlikda o‘tkazish, eski xatolarini qayta ko‘rib chiqish va yaxshiroq odam bo‘lishiga turtki beradi.
Mazkur multfilm bayram bahonasida uzoqlashgan qalblarning birlashishi haqidagi asar bo‘lib, unga xonanda Ed Shiran maxsus saundtrek yozgan.
“Qo‘l yuki” (Rejissyor Jaume Kolyet-Serra)
Los Anjeles, Rojdestvo kuni. Itan Kopek ismli aeroport xavfsizligi xodimi uzoq vaqtdan beri kechki navbatchiligi tugashini va homilador ayoli bilan birgalikda yangi yilni nishonlashni intiqlik bilan kutadi. Lavozimi ko‘tarilishini maqsad qilgan Kopek rahbariyatdan murakkabroq vazifa berilishini va uni introskoppa qo‘yishni so‘raydi. Ko‘p o‘tmay, Itan bilan noma’lum shaxs bog‘lanadi va zudlik bilan introskop orqali taqiqlangan yuklarni o‘tkazishni talab qiladi, aks holda uning sevgilisi vafot etishini aytadi. Ikki o‘t orasida qolib ketgan stajyor ishchi jinoyatchilarni qanday to‘xtatish va minglab amerikaliklar uchun qadrli bo‘lgan Rojdestvoni saqlab qolish masalasini tez hal qilishi kerak bo‘ladi.
“Qadrli Santa” (rejissyor Bobbi Farrelli)
Filmning bosh qahramoni Liam ismli bola bo‘lib, u maktabda ham, uyda ham qiyinchiliklarga duch kelib yuradi. 11 yoshli o‘smir yoqtirgan qizining e’tiborini jalb qila olmaydi, do‘st ham orttira olmaydi, ota-onasi bilan esa doimo janjal qiladi. Shunda muammolarning yechimi sifatida boshqa yo‘l — Qorboboga xat yozishga qaror qiladi. Ammo Liam disgrafiyadan aziyat chekkani tufayli xatda Santa o‘rniga satan deb yozadi va maktubni Qorboboga emas, tasodifan Shaytonga yuboradi . U shu zahoti Liam oldiga shoxli odam qiyofasida (Jek Blek) paydo bo‘ladi va yigitga uchta tilagini bajo keltirishini aytadi. Shundan so‘ng yosh bolaning ruhini do‘zaxga olib ketishga va’da beradi.
Filmdagi kulgili kadrlar, hazillarning barchasi Rojdestvo arafasida do‘stlik, sevgi va oilani saqlab qolish haqidagi an’anaviy qadriyatlarga to‘la.
“Missiya: Qizil” (rejissyor Jeyk Kezdan)
Yangi yilga hali bir oy bor, ammo “Qizil” laqabli Santani o‘g‘irlab ketishadi. Rojdestvoni qutqarish uchun Shimoliy qutb xavfsizlik xizmati boshlig‘i va bosh ovchisi (Dueyn Jonson va Kris Evans) birlashadi va xavfli safarga otlanadi. Ularning davrasiga maftunkor va xavfli Lyusi Lyu ham qo‘shiladi.
Film AQSHda 15-noyabrda chiqdi va juda past natijalarni ko‘rsatdi. 250 million dollarlik byudjetli film debyut kunida atigi 11 million dollar yig‘di. Butun dunyo bo‘ylab kassa yig‘imi hozirda 175 million dollarni tashkil qiladi. Ko‘rsatkich o‘sishda davom etmoqda, chunki film hali ham kinoteatrlarda namoyish etilmoqda.
Filmda J.K Simmons (“O‘rgimchak odam”), Lyusi Lyu (“Charli farishtalari”), Kristofer Hivyu (“Taxtlar o‘yini”) va boshqa taniqli aktyorlar ishtirok etgan.
Izoh (0)