Toshkentning Chilonzor tumanidagi 188-maktabda dars payti 6-sinf o‘quvchisini urgan ayol jarimaga tortildi, maktab direktori esa ishdan olindi.
“Gazeta.uz”ga huquq-tartibot idoralaridagi manbalarining ma’lum qilishicha, rasman hech qayerda ishlamagan (2014-yildan buyon vaqti-vaqti bilan Rossiya va Qozog‘istonga ishlash uchun borib turgan) O.R. 23-sentyabr kuni 188-sonli maktabning direktor o‘rinbosari lavozimi uchun suhbatga kelgan. Maktab direktori unga hali hujjatlar rasmiylashtirilmay turib sinov muddatida rus tilida o‘qitiladigan 6-sinf o‘quvchilariga rus tili va adabiyoti fanidan dars berishni tayinlagan.
23-sentyabr, ishining birinchi kunida u 6-sinfdagi o‘quvchi bilan janjallashib qolgan. Ayol ikki tilda: rus va o‘zbek tillarida dars bergan. O‘quvchilardan biri (millati bo‘yicha tatar) undan rus tilida dars berishni so‘ragan. Bola bilan janjallashib qolgan ayol uning qulog‘idan tortib, doska tomon itarib yuborgan, yuziga tarsaki tushirgan va boshini doskaga urgan.
Voqeadan xabar topgan o‘quvchining ota-onasi shu kuniyoq Chilonzor tumani IIBga murojaat qilgan. Sudda bolaning onasi o‘sha kuni o‘g‘li uyga tushkun holatda kelganini va maktabga borishni istamayotganini bildirgan. Onasi uni shifokorga ham olib borgan.
24-sentyabrda ona dars o‘tgan ayolga qo‘ng‘iroq qilib, vaziyatga oydinlik kiritganida u haqoratomuz so‘zlar bilan javob qaytargan. Bolaning otasi telefon qilganida uni ham haqorat qilgan. Erkak sudga suhbatning yozuvini taqdim etgan.
Shu kuni O.R. qizi o‘qiyotgan boshqa maktabga borib, janjallashib, maktab direktori o‘rinbosari bo‘lgan ayol G‘.M.ga nisbatan jismoniy kuch ishlatgan. Ayoldan jamoat tartibiga rioya qilish so‘ralganida, maktab hududida Milliy gvardiya va IIO xodimlariga nisbatan g‘ayriijtimoiy munosabatda bo‘lib, ularning qonuniy talablarini bajarmasdan keskin qarshilik ko‘rsatgan.
25-sentyabr kuni ish sudda ko‘rib chiqilib, unga 7 sutka ma’muriy qamoq jazosi, BHMning 3 baravari (1 020 000 so‘m) va BHMning 7 baravari (2 380 000 so‘m) miqdorida jarima jazosi tayinlangandi.
O.R. hibsni o‘tayotgan maxsus tergov hibsxonasidan qatnashgan sudda o‘z aybiga qisman iqror bo‘ldi. Sud ish materiallarini, shu jumladan, video va audio dalillarni o‘rganib chiqib, ishning Ma’muriy javobgarlik to‘g‘risidagi 41-moddasi (haqorat qilish), 52-moddaning 2-qismi (qasddan badanga yengil tan jarohati yetkazish) va 59−2-moddasi (oilaviy (maishiy) zo‘ravonlik) bilan to‘g‘ri kvalifikatsiya qilinganini qayd etgan.
Ma’muriy huquqbuzarliklar to‘g‘risidagi kodeksning 34-moddasi (bir necha huquqbuzarlikni sodir etganlik uchun ma’muriy jazo qo‘llash) inobatga olingan holda, O.R.ga davlat foydasiga BHMning 20 baravari (6,8 million so‘m) miqdorida jarima tayinlandi.
Ayol o‘quvchini urgani aks etgan video tarqalgan kuni tuman hokimligida ota-onalar va maktab ma’muriyati ishtirokida yig‘ilish o‘tkazilgan. 188-maktab direktori hech qanday hujjat to‘ldirmasdan darsga begona odamni kiritgani uchun lavozimidan ozod etilgan.
Izoh (2)
Tog'ri jazo yaxshi lekin sal narsaga jarimalar berilaversa kelajakda o'qituvchi zoti yo bolib ketadiku.Hech qaysi bola men o'qituvchi bolaman deb chiqmaydiku.Ishga olayapganda ham oldin pisixalogik testdan otkazib keyin ishga olish kerak edi shu yerda ham tagini korsa poraxorlik bor.
Tog'ri gaplarni aytiz qoshilaman.Aslida rus sinflarda kopi o'zbek bolalari bor ular ham darsliklari o'zbekcha yozilishini hohlaydi.Darsliklarini rus tilida chop etilgan variantni berganini oqolmaydigan bollar ham bor.Shu sinflarga e'tiborli bolishni va qayta sinflarga bolishni maslahat bermoqchidim.